घोट वनपरिक्षेत्रातील वन विभागाच्या शासकीय लाकूड डेपोला आग लागून लाखो रुपयांचे नुकसान झाल्याच्या प्रकरणी संबंधित शेतकऱ्याविरोधात घोट पोलीस मदत केंद्रात गुन्हा दाखल करण्यात आला आहे.
लाखोंचे नुकसान; घोट पोलीस मदत केंद्रात गुन्हा दाखल
घोट (Forest Department) : घोट वनपरिक्षेत्रातील वन विभागाच्या शासकीय लाकूड डेपोला आग लागून लाखो रुपयांचे नुकसान झाल्याच्या प्रकरणी संबंधित शेतकऱ्याविरोधात घोट पोलीस मदत केंद्रात गुन्हा दाखल करण्यात आला आहे.
प्राप्त माहितीनुसार, २४ मे रोजी डेपोच्या शेजारील शेतातील काडीकचरा व तण जाळण्यासाठी शेतकरी विनोद विश्वनाथ गुरनुले (वय ३२, रा. कर्दुळ निकतवाडा) यांनी आग लावली होती. मात्र ही आग नियंत्रणाबाहेर जाऊन वन विभागाच्या विक्री आगारापर्यंत पोहोचली.
या भीषण आगीत डेपोतील मिश्र जातीचे अंदाजे ३०० ते ३५० बिट जळून खाक झाले. तसेच परिसरातील विविध जातींच्या उभ्या झाडांनाही आग लागून मोठे नुकसान झाले. या घटनेत वन विभागाचे अंदाजे १८ ते १९ लाख रुपयांचे नुकसान झाल्याची प्राथमिक माहिती समोर आली आहे. याप्रकरणी घोट येथील लाकूड आगाराचे क्षेत्रसहाय्यक अरुण येनगंटीवार यांनी २५ मे रोजी घोट पोलीस मदत केंद्रात फिर्याद दाखल केली. फिर्यादीत, शेतातील काडीकचरा जाळताना आग इतरत्र पसरून नुकसान होऊ शकते याची कल्पना असतानाही निष्काळजीपणे आग लावल्याचा आरोप करण्यात आला आहे. तसेच या आगीत वन विभागासह जंगल कामगार संस्था पळसगाव यांचेही नुकसान झाल्याचे नमूद करण्यात आले आहे.
फिर्यादीवरून घोट पोलिसांनी संबंधित शेतकऱ्याविरोधात भारतीय न्याय संहिता २०२३ च्या कलम ३२४(५) अंतर्गत गुन्हा दाखल केला आहे. या घटनेचा पुढील तपास सहाय्यक पोलीस निरीक्षक किशोर शिंदे यांच्या मार्गदर्शनाखाली पोलीस उपनिरीक्षक संजय गोगले करीत आहेत.