राज्यात भेसळयुक्त आणि निकृष्ट दर्जाच्या अन्नपदार्थांविरोधातील अन्न व औषध प्रशासनाची मोहीम अधिक तीव्र झाली आहे.
तुकाराम मुंढे यांच्या नेतृत्वाखालील मोहिमेची कारवाई सुरूच; अस्वच्छता व नियमभंगामुळे नमुने जप्त, प्रयोगशाळा अहवालानंतर पुढील कारवाई
राज्यात भेसळयुक्त आणि निकृष्ट दर्जाच्या अन्नपदार्थांविरोधातील अन्न व औषध प्रशासनाची मोहीम अधिक तीव्र झाली आहे. नामांकित हॉटेलांपासून ते रस्त्यावरील खाद्यपदार्थ विक्रेत्यांपर्यंत कारवाईचा धडाका सुरू असतानाच आता बीड जिल्ह्यातील अंबाजोगाई येथील एका चायनीज सेंटरवर प्रशासनाने धाड टाकून आस्थापना बंद करण्याचे आदेश दिले आहेत.
मिळालेल्या माहितीनुसार, अंबाजोगाई शहरातील बाजार परिसरात असलेल्या तवक्कल चायनीज सेंटरची सोमवारी अन्न व औषध प्रशासनाने तपासणी केली. अन्न सुरक्षा अधिकारी अ. दि. नरवाडे यांच्या नेतृत्वाखालील पथकाने ३ ऑगस्ट रोजी सायंकाळी ही कारवाई केली. तपासणीदरम्यान संबंधित आस्थापनामध्ये अन्न सुरक्षा नियमांचे गंभीर उल्लंघन होत असल्याचे निदर्शनास आले.
चौकशीत संबंधित चायनीज सेंटर कोणताही आवश्यक परवाना न घेता सुरू असल्याचे स्पष्ट झाले. तसेच स्वयंपाकघर आणि खाद्यपदार्थ तयार करण्याच्या जागेतील अस्वच्छता व स्वच्छतेच्या निकषांचे पालन न झाल्याचे आढळल्याने अधिकाऱ्यांनी तातडीची कारवाई करत आस्थापना बंद करण्याचे आदेश दिले.
कारवाईदरम्यान खाद्यपदार्थ तयार करण्यासाठी वापरल्या जाणाऱ्या कच्च्या मालासह इतर अन्नपदार्थांचे नमुने जप्त करण्यात आले आहेत. हे नमुने प्रयोगशाळेत तपासणीसाठी पाठविण्यात आले असून, अहवाल प्राप्त झाल्यानंतर संबंधितांवर पुढील कायदेशीर कारवाई करण्यात येणार आहे. अन्न सुरक्षा व मानके अधिनियम, २००६ अंतर्गत आवश्यक परवाना मिळेपर्यंत हे चायनीज सेंटर बंद ठेवण्याचे आदेश देण्यात आले असून, आदेशाचे उल्लंघन झाल्यास कठोर दंडात्मक कारवाईचा इशाराही प्रशासनाने दिला आहे.
अंबाजोगाई आणि केज परिसरात अस्वच्छ व निकृष्ट दर्जाचे अन्न विक्रीबाबत प्रशासनाकडे सातत्याने तक्रारी येत होत्या. या पार्श्वभूमीवर ही धाड टाकण्यात आली. कारवाईची माहिती परिसरात पसरताच बाजारातील अनेक हॉटेल्स आणि मांसविक्रीची दुकाने घाईघाईने बंद करण्यात आली. नागरिकांच्या आरोग्याशी कोणतीही तडजोड केली जाणार नसून, अन्न व औषध प्रशासनाची तपासणी मोहीम पुढेही सुरू राहणार असल्याचे अधिकाऱ्यांनी स्पष्ट केले आहे.