शक्तिपीठ महामार्ग रद्द करण्यासाठी जवळा बाजारात रास्ता रोको

जवळा बाजार (Shaktipeeth Highway Andolan) : औंढा व वसमत तालुक्यातून जाणारा प्रस्तावित शक्तिपीठ महामार्ग रद्द करण्यासाठी सोमवारी येथील बस स्टैंड वर महामार्गावर शेतकऱ्यांनी रास्ता रोको केला होता. याप्रसंगी महामार्ग रद्द कृती समितीचे संदीप माटेगावकर, नरवाडे, नवनाथ कुऱ्हे, नंदू बाहेती यांच्यासहित अनेक जणांचे समयोचित भाषणे झाली. मात्र नुकताच सत्ताधारी पक्षात प्रवेश केलेल्या एका पुढार्‍याने अनेक वर्षे विरोधात घालवल्यामुळे शक्तिपीठ महामार्ग रद्द करण्यासाठी सरकार विरोधात भाषण केल्यामुळे उलट सुलट चर्चा रंगली होती.

शक्तिपीठ महामार्गासाठी (Shaktipeeth Highway Andolan) संपादित करण्यात येणारी जमीन अत्यंत सुपीक असल्यामुळे सदर महामार्ग झाल्यास शेतकरी देशोधडीला लागण्याची शक्यता आहे. तसेच एखाद्या शेतकऱ्याच्या शेतामधून महामार्ग गेल्यास शेताच्या दोन्ही बाजूला जाण्यासाठी त्याला तीन किलोमीटरचा हेलपाटा पडण्याची शक्यता आहे. तसेच यामुळे हजारो वृक्षतोड होणार असल्यामुळे पर्यावरणाचा मोठा ऱ्हास होण्याची शक्यता आहे. त्यामुळे सदर महामार्ग रद्द करावा असे निवेदन तहसील कार्यालयामार्फत मुख्यमंत्र्यांना पाठवण्यात आले आहे.

महसूल विभागातर्फे निवडणूक विभागाचे नूतन नायब तहसीलदार काळे, तलाठी संगमेश्वर सोनटक्के यांनी निवेदन स्वीकारले. सहाय्यक  पोलीस निरीक्षक कैलास भगत, पोलीस उपनिरीक्षक श्रीधर वाघमारे व अमोल इंगोले, जमादार इमरान सिद्दिकी, राजू  ठाकूर व दिलीप नाईक यांच्यासह इतर कर्मचाऱ्यांनी चोख पोलीस बंदोबस्त ठेवला होता.