ईराण-अमेरिका युद्धाच्या पार्श्वभूमीवर जागतिक स्तरावर इंधन संकटाची चाहूल लागली असताना देशातही पेट्रोल-डिझेलच्या वाढत्या वापरामुळे चिंता व्यक्त होत आहे.
उदगीर (Electric Vehicle) : ईराण-अमेरिका युद्धाच्या पार्श्वभूमीवर जागतिक स्तरावर इंधन संकटाची चाहूल लागली असताना देशातही पेट्रोल-डिझेलच्या वाढत्या वापरामुळे चिंता व्यक्त होत आहे. या परिस्थितीत पंतप्रधान नरेंद्र मोदी यांनी मंत्री, राज्यमंत्री आणि लोकप्रतिनिधींना ताफ्यातील वाहनसंख्या कमी करण्याचे तसेच पेट्रोल-डिझेल वाहनांचा वापर टाळण्याचे आवाहन केले होते.
या आवाहनाला सर्वात ठोस आणि धडाकेबाज प्रतिसाद देत माजी क्रीडा मंत्री तथा आमदार संजय बनसोडे यांनी आपल्या ताफ्यात मोठा बदल करत राजकीय संस्कृतीत नवा आदर्श निर्माण केला आहे. त्यांनी केवळ ताफ्यातील वाहनांना कात्री लावली नाही, तर कायम सोबत असणाऱ्या पोलीस एस्कॉर्टलाही स्पष्ट नकार दिला आहे.
“आता माझ्या ताफ्यात फक्त एकच वाहन राहील आणि तेही ई-कार!” अशी घोषणा करत त्यांनी एमएच-२४-बीएक्स-९४०० क्रमांकाची ई-कार वापरण्यास सुरुवात केली आहे.
मुख्यमंत्री देवेंद्र फडणवीस यांच्या पर्यावरणपूरक आवाहनालाही प्रतिसाद देत बनसोडे यांनी आपल्या दौऱ्यांमधून एस्कॉर्ट संस्कृतीलाच रामराम ठोकला आहे.“पेट्रोल-डिझेलवरील अवलंबित्व कमी करण्यासाठी आणि इंधन बचतीसाठी प्रत्येकाने पुढे यायला हवे. पंतप्रधान नरेंद्र मोदी यांच्या आवाहनानंतर मी स्वतःपासून बदलाची सुरुवात केली आहे. इतरांनीही पुढे यावे,” असे आवाहन आ. बनसोडे यांनी केले.
दरम्यान, वाढते इंधन दर, जागतिक युद्धजन्य परिस्थिती आणि ऊर्जा संकटाच्या छायेत एका आमदाराने स्वतःच्या ताफ्यालाच ब्रेक लावल्याने राजकीय वर्तुळात खळबळ उडाली आहे.
“ताफ्याला ब्रेक… ई-कारला ग्रीन सिग्नल!”
माजी मंत्री आ. संजय बनसोडे यांनी ई-कारमधून दौरे करत एस्कॉर्ट संस्कृतीला रामराम ठोकत मतदारसंघात दौरे सुरू केले आहेत. या दौऱ्यांमुळे त्यांच्या ई-कारची मोठी चर्चा रंगत आहे.
राजकारणात मोठे ताफे, सायरन आणि एस्कॉर्ट संस्कृतीला सरावलेल्या वातावरणात बनसोडे यांनी घेतलेला हा निर्णय वेगळा आणि धाडसी मानला जात आहे. इंधन बचत, पर्यावरण संवर्धन आणि साधेपणाचा संदेश देणारा हा निर्णय राज्यभर चर्चेचा केंद्रबिंदू ठरला आहे.
राजकीय वर्तुळातही या निर्णयाची जोरदार चर्चा सुरू असून, भविष्यात इतर लोकप्रतिनिधीही असा पायंडा पाडतात का याकडे सर्वांचे लक्ष लागले आहे.