राज्याच्या अन्न व औषध प्रशासनाने गेल्या महिनाभरापासून विविध ठिकाणी तपासणी आणि कारवाईची मोहीम तीव्र केली आहे.
छत्रपती संभाजीनगर : राज्याच्या अन्न व औषध प्रशासनाने गेल्या महिनाभरापासून विविध ठिकाणी तपासणी आणि कारवाईची मोहीम तीव्र केली आहे. गावातील पानपट्ट्यांपासून मोठ्या आस्थापनांपर्यंत तपासणी केली जात असून दूध भेसळ, हॉटेल्स, मेडिकल्स आणि इतर व्यवसायांवर कारवाई करण्यात येत आहे. सनदी अधिकारी तुकाराम मुंढे यांनी विभागाच्या आयुक्तपदाची सूत्रे स्वीकारल्यानंतर या कारवायांना वेग आल्याचे दिसत आहे.
छत्रपती संभाजीनगर जिल्ह्यात गेल्याच आठवड्यात दूध भेसळीविरोधात मोठी कारवाई करण्यात आली होती. त्यानंतर आता खाद्यतेलाच्या रिपॅकिंग व्यवसायावर अन्न व औषध प्रशासनाने लक्ष केंद्रित केले आहे. दोन ऑईल रिपॅकिंग युनिट्सवर टाकण्यात आलेल्या छाप्यांमध्ये तब्बल 2 कोटी 93 लाख 35 हजार 603 रुपये किमतीचा संशयित निकृष्ट दर्जाचा खाद्यतेलाचा साठा जप्त करण्यात आला आहे.
‘सेफ फूड, सेफ महाराष्ट्र’ मोहिमेअंतर्गत छापे
अन्न व औषध प्रशासनाच्या पथकाने ‘सेफ फूड, सेफ महाराष्ट्र’ मोहिमेअंतर्गत 11 जुलै रोजी पैठण येथील बागरिया अॅग्रो प्रॉडक्ट्स आणि छत्रपती संभाजीनगर शहरातील बागरिया व्हेजिटेबल प्रॉडक्ट्स या दोन ऑईल रिपॅकिंग युनिट्सवर अचानक तपासणी केली.
तपासणीदरम्यान खाद्यतेलाचे रिपॅकिंग अत्यंत अस्वच्छ परिस्थितीत सुरू असल्याचे आढळून आल्याचे प्रशासनाने म्हटले आहे. युनिट्समध्ये वापरलेले टिन पुन्हा वापरले जात असल्याचेही तपासणीत समोर आले.
यंत्रसामग्रीवर धूळ, गंज आणि घाण
कारवाईदरम्यान रिपॅकिंगसाठी वापरण्यात येणाऱ्या यंत्रसामग्रीवर धूळ, गंज आणि घाण साचल्याचे आढळले. तसेच, दुर्गंधी येणारे तेलाचे टबही तपासणी पथकाच्या निदर्शनास आले. खाद्यतेलाच्या पॅकिंग प्रक्रियेसाठी आवश्यक असलेल्या फूड ग्रेड प्रमाणपत्रांचाही अभाव असल्याचे तपासात समोर आले.
तेलाची गुणवत्ता तपासण्यासाठी संबंधित ठिकाणी प्रयोगशाळेची सुविधा नसल्याचे तसेच आवश्यक तांत्रिक कर्मचाऱ्यांची नियुक्तीही करण्यात आली नसल्याचे प्रशासनाच्या तपासणीत आढळले. ग्राहकांच्या आरोग्याशी थेट संबंधित असलेल्या खाद्यतेलाच्या हाताळणी आणि पॅकिंग प्रक्रियेत अशा गंभीर त्रुटी आढळल्याने प्रशासनाने कारवाई केली.
पाम, सोयाबीन आणि कपाशीच्या तेलासह मोठा साठा जप्त
दोन्ही युनिट्सवरील कारवाईत पामतेल, सोयाबीन तेल, कपाशीचे तेल आणि अज्ञात वनस्पती तेलाचा मोठा साठा जप्त करण्यात आला. या संपूर्ण साठ्याची किंमत 2 कोटी 93 लाख 35 हजार 603 रुपये असल्याचे सांगण्यात आले आहे.
जप्त करण्यात आलेला खाद्यतेलाचा साठा संशयित निकृष्ट दर्जाचा असल्याने त्याचे नमुने पुढील तपासणीसाठी प्रयोगशाळेत पाठवण्यात आले आहेत. प्रयोगशाळेतील तपासणीनंतर तेलाच्या गुणवत्तेबाबत पुढील बाबी स्पष्ट होणार आहेत.
ग्राहकांच्या आरोग्याचा विचार करून बागरिया अॅग्रो प्रॉडक्ट्स आणि बागरिया व्हेजिटेबल प्रॉडक्ट्स या दोन्ही आस्थापनांचे परवाने तात्काळ निलंबित करण्यात आले आहेत.
तुकाराम मुंढे यांच्या पदभारानंतर कारवाईला वेग
सनदी अधिकारी तुकाराम मुंढे यांनी अन्न व औषध प्रशासन विभागाच्या आयुक्तपदाचा कार्यभार स्वीकारल्यानंतर राज्यभरातील तपासणी मोहिमांना वेग आला आहे. गेल्या महिनाभरात दूध भेसळ, हॉटेल्स, मेडिकल्स आणि इतर विविध आस्थापनांवर विभागाने छापे टाकून कारवाई केली आहे.
छत्रपती संभाजीनगर जिल्ह्यातही अन्नपदार्थांच्या गुणवत्तेबाबत प्रशासनाने कारवाईची व्याप्ती वाढवली आहे. दूध भेसळीनंतर आता खाद्यतेलाच्या रिपॅकिंग युनिट्सवर झालेल्या मोठ्या कारवाईमुळे अन्नपदार्थांच्या गुणवत्ता आणि सुरक्षिततेचा मुद्दा पुन्हा चर्चेत आला आहे.
मराठवाड्यात दूध संकलनात 1 लाख लिटरची घट
दरम्यान, मराठवाड्यात बनावट आणि भेसळयुक्त दूध विक्रेत्यांविरोधात अन्न व औषध प्रशासनाने गेल्या महिनाभरात सुरू केलेल्या मोहिमेचा परिणाम दूध संकलनाच्या आकडेवारीतही दिसून येत आहे. अवघ्या एका महिन्यात मराठवाड्यातील दूध संकलन तब्बल 1 लाख लिटरने घटले आहे.
अन्न व औषध प्रशासनाने मराठवाड्यात विविध ठिकाणी छापे टाकून बनावट आणि भेसळयुक्त दूध विक्रेत्यांविरोधात कारवाई केली. या कारवाईनंतर दूध संकलनात लक्षणीय घट झाल्याचे चित्र समोर आले आहे. FDA च्या मोहिमेमुळे भेसळयुक्त दूध विक्रीला आळा बसत असल्याचे दिसून येत आहे.