परभणी शहरातील जिंतूर रोडवरील कुंभकर्ण टाकळी शिवारातील आकाशवाणी परिसरात मद्यधुंद कार चालकाने कर्तव्य बजावून घरी परतणाऱ्या पोलीस कर्मचाऱ्याच्या दुचाकीला जोरदार धडक दिल्याची घटना घडली.
परभणी : परभणी शहरातील जिंतूर रोडवरील कुंभकर्ण टाकळी शिवारातील आकाशवाणी परिसरात मद्यधुंद कार चालकाने कर्तव्य बजावून घरी परतणाऱ्या पोलीस कर्मचाऱ्याच्या दुचाकीला जोरदार धडक दिल्याची घटना घडली. या भीषण अपघातात दुचाकीचा अक्षरशः चुराडा झाला असून पोलीस कर्मचारी गंभीर जखमी झाले आहेत. त्यांच्यावर परभणीतील खासगी रुग्णालयात उपचार सुरू आहेत.
अपघातात गंभीर जखमी झालेल्या पोलीस कर्मचाऱ्याचे नाव विकास विश्वनाथ खैरे (रा. कौसडी) असे असून ते परभणी पोलीस मुख्यालयात कार्यरत आहेत.
माहितीनुसार, शुक्रवार (दि. १७ जुलै) रोजी सायंकाळी सुमारे ८ वाजण्याच्या दरम्यान ड्युटी पूर्ण करून विकास खैरे हे त्यांच्या होंडा युनिकॉर्न (एमएच २२ बीडी ६९६७) या दुचाकीवरून परभणीहून कौसडी गावाकडे निघाले होते.
याचवेळी मौजे टाकळी कुंभकर्ण येथून धर्मापुरीच्या दिशेने इको कार (एमएच २२ बीके २३३०) भरधाव वेगाने येत होती. या वाहनाचा चालक गजानन कदम (रा. धर्मापुरी) हा मद्यधुंद अवस्थेत असल्याचे समोर आले आहे. दारूच्या नशेत वाहनावरील नियंत्रण सुटल्याने त्याने निष्काळजीपणे समोरून येणाऱ्या दुचाकीला जोरदार धडक दिली.
या अपघातात पोलीस कर्मचारी विकास खैरे गंभीर जखमी झाले असून त्यांच्या दुचाकीच्या समोरील भागासह इंजिनचा मोठ्या प्रमाणात चक्काचूर झाला आहे.
दरम्यान, कारमधील एअरबॅग वेळेवर उघडल्यामुळे चालक गजानन कदम याला कोणतीही दुखापत झाली नाही. संबंधित इको कार त्याने अवघ्या महिनाभरापूर्वीच खरेदी केल्याची माहिती समोर आली आहे.