बुलढाणा रोडवरील दांडगे पेट्रोल पंपाजवळ मोटारसायकल व वॅगनार कारमध्ये झालेल्या भीषण अपघातात एका युवकाचा जागीच मृत्यू झाला.
चिखली (Dandge Petrol Pump) : शहरालगतच्या बुलढाणा रोडवरील दांडगे पेट्रोल पंपाजवळ सोमवारी (१ जून) रात्री सुमारे ७.३० वाजेच्या सुमारास मोटारसायकल व वॅगनार कारमध्ये झालेल्या भीषण अपघातात एका युवकाचा जागीच मृत्यू झाला, तर दुसरा युवक गंभीर जखमी झाला.
मिळालेल्या माहितीनुसार, अक्षय कुलसुंदर व गोलू गवारे हे दोघे रायडर स्पोर्ट मोटारसायकल (क्र. एमएच-२८ बीएक्स-२७८६) वरून बुलढाण्याकडून चिखलीकडे येत होते. दरम्यान, दांडगे पेट्रोल पंपाजवळ त्यांची मोटारसायकल वॅगनार कार (क्र. एमएच-४९ बीबी-६३४६) वर आदळली. धडक इतकी जबरदस्त होती की वॅगनार कारचे काही भाग तुटून विखुरले.
या भीषण अपघातात अक्षय कुलसुंदर याचा घटनास्थळीच मृत्यू झाला, तर गोलू गवारे हा जखमी झाला असून त्याच्यावर जे जे प्लस हॉस्पिटल, छत्रपती संभाजीनगर येथे उपचार सुरू आहेत. मृत व जखमी दोघेही चिखली शहरातील राऊतवाडी परिसरातील रहिवासी असल्याची माहिती मिळाली आहे.
घटनेची माहिती मिळताच चिखली पोलीस घटनास्थळी दाखल झाले. पंचनामा करून पुढील तपास व कायदेशीर कारवाई सुरू असल्याचे पोलिसांनी सांगितले.
या दुर्घटनेमुळे चिखली शहरात शोककळा पसरली असून परिसरात हळहळ व्यक्त होत आहे.