अन् हिंगोलीत दुकानावर आढळला किशोरवयीन कामगार; गुन्हा दाखल

हिंगोली (Child Labour) : अनेक ठिकाणी बालकामगार कामावर असल्याच्या तक्रारी समोर येत असताना सरकारी कामगार अधिकारी कार्यालयाच्या कार्यपद्धतीवरही प्रश्नचिन्ह उपस्थित होत आहे. याच पार्श्वभूमीवर बालकामगार दिनानिमित्त सचित्र वृत्त प्रसिद्ध झाल्यानंतर प्रशासनाने कारवाईचा बडगा उगारला असून, १७ जून रोजी रेल्वे स्टेशन उड्डाण पुलाजवळील एका सर्व्हिसिंग सेंटरमध्ये किशोरवयीन कामगार आढळून आल्याने गुन्हा दाखल करण्यात आला आहे.

मिळालेल्या माहितीनुसार, १७ जून रोजी सरकारी कामगार अधिकारी कार्यालयाच्या पथकाने दुपारी रेल्वे उड्डाण पुलाजवळील खडकदकर सर्व्हिसिंग सेंटर येथे तपासणी केली. या तपासणीत किशोरवयीन कामगार काम करताना आढळून आला.

या प्रकरणी दुकाने निरीक्षक सुभाष पेरके यांनी दिलेल्या फिर्यादीवरून शेख मोहसीन शेख महेमुद (रा. रिसाला बाजार, हिंगोली) यांच्याविरुद्ध हिंगोली शहर पोलीस ठाण्यात गुन्हा नोंदविण्यात आला आहे.

या प्रकरणाचा पुढील तपास पोलीस कर्मचारी सुनील अंभोरे करीत आहेत.