शेगाव-बाळापूर रोडवर गुरुवारी भीषण अपघाताची घटना घडली.
बाळापूर (Bus Fire Accident) : शेगाव-बाळापूर रोडवर गुरुवारी भीषण अपघाताची घटना घडली. इंदौरहून अकोल्याकडे जाणारी स्वस्तिक ट्रॅव्हल्सची लक्झरी बस आणि दुचाकी यांच्यात झालेल्या अपघातानंतर बसने अचानक पेट घेतल्याने काही वेळातच संपूर्ण बस जळून खाक झाली. सुदैवाने या घटनेत कोणतीही जीवितहानी झाली नाही.
मिळालेल्या माहितीनुसार, स्वस्तिक ट्रॅव्हल्सची लक्झरी बस इंदौरवरून अकोल्याकडे जात असताना शेगाव-बाळापूर रोडवर एका दुचाकीस्वाराचे वाहनावरील नियंत्रण सुटले. अनियंत्रित दुचाकी थेट बसखाली गेल्याने बसचे टायर फुटले. त्यानंतर दुचाकी बसखाली अडकल्यामुळे घर्षणातून आग लागल्याचा प्राथमिक अंदाज व्यक्त करण्यात येत आहे.
काही क्षणांतच आगीने रौद्ररूप धारण करत संपूर्ण बसला वेढले. आग इतकी भीषण होती की काही वेळातच बस पूर्णपणे जळून खाक झाली. या अपघातात दुचाकी चालक जखमी झाला असून त्याला उपचारासाठी रुग्णालयात दाखल करण्यात आले आहे.
घटनेची माहिती मिळताच बाळापूर नगर परिषदेकडील अग्निशमन दलाची गाडी घटनास्थळी दाखल झाली. अग्निशमन दलाच्या जवानांनी शर्थीचे प्रयत्न करत आगीवर नियंत्रण मिळवले.
दरम्यान, भररस्त्यात बस पेटल्याची घटना समजताच परिसरातील नागरिकांनी घटनास्थळी मोठी गर्दी केली होती. पोलिसांनी घटनास्थळी धाव घेत वाहतूक सुरळीत करत पुढील तपास सुरू केला आहे.