पुण्यातील पिंपरी-चिंचवड परिसरात एक धक्कादायक घटना समोर आली आहे.
पुणे (Bishnoi Gang) : पुण्यातील पिंपरी-चिंचवड परिसरात एक धक्कादायक घटना समोर आली आहे. लॉरेन्स बिश्नोई गँगशी संबंधित दोन शूटरांनी एका फर्निचर मॉलवर तब्बल ६ गोळ्या झाडल्याची माहिती समोर आली आहे. या घटनेत त्यांनी दोन पिस्तुलांचा वापर केल्याचे सांगितले जात आहे.
मिळालेल्या माहितीनुसार, हे दोन्ही शूटर दुचाकीवरून आले आणि त्यांनी मॉलवर सलग ५ ते ६ राउंड फायरिंग केली. हा हल्ला शुभम लोणकर याच्या सूचनेवरून करण्यात आल्याचे सांगितले जात आहे.
गोळीबारानंतर फेसबुक पोस्टद्वारे कबुली
घटनेनंतर लोणकरने सोशल मीडिया प्लॅटफॉर्म फेसबुकवर पोस्ट करत हल्ल्याची जबाबदारी स्वीकारल्याचे वृत्त आहे. व्हायरल झालेल्या सीसीटीव्ही फुटेजमध्ये दोन्ही शूटर मॉलवर सतत गोळीबार करताना स्पष्टपणे दिसत आहेत.
या हल्ल्यात ‘AJ Furniture Mall’चे मोठे नुकसान झाले असून बाहेरील काचांचे मोठ्या प्रमाणात नुकसान झाले आहे. हा मॉल अशोक नैन यांचा असल्याचे समोर आले आहे.
मालकाला धमकी
फेसबुक पोस्टमध्ये नैन यांना थेट धमकी देण्यात आली असून, त्यांच्यावर एमडी ड्रग्स तस्करीत सहभाग असल्याचा आरोप करण्यात आला आहे. पुढची गोळी थेट त्यांच्या डोक्यावर झाडली जाईल, अशी धमकीही देण्यात आली आहे.
पोलीस तपास सुरू
घटनेनंतर स्थानिक पोलीस तातडीने घटनास्थळी दाखल झाले असून तपास सुरू केला आहे. बिश्नोई गँगशी संबंधित या प्रकरणात विशेष पथके तयार करण्यात आली असून, फरार आरोपींचा शोध सुरू आहे. वरिष्ठ अधिकाऱ्यांनी सांगितले की, प्रकरण गांभीर्याने तपासले जात असून सर्व बाजूंनी चौकशी सुरू आहे.