BHMS-CCMP नोंदणीला विरोध; ६ ऑगस्टपासून आपत्कालीन सेवांसह राज्यव्यापी बेमुदत कामबंदचा इशारा

प्रस्तावित BHMS-CCMP नोंदणी प्रक्रिया स्थगित करण्याची मागणी; निवासी डॉक्टरांच्या प्रलंबित प्रश्नांवर तोडगा न निघाल्यास आंदोलन तीव्र करण्याचा निर्णय

मलकापूर  : प्रस्तावित BHMS-CCMP नोंदणी प्रक्रिया तात्काळ स्थगित करावी आणि निवासी डॉक्टरांच्या प्रलंबित मागण्यांवर त्वरित निर्णय घ्यावा, या प्रमुख मागण्यांसाठी राज्यातील विविध वैद्यकीय संघटनांनी संयुक्त आंदोलनाचा इशारा दिला आहे. ५ ऑगस्ट २०२६ रोजी रात्री १२:०० वाजल्यापासून नॉन-इमर्जन्सी वैद्यकीय सेवा बंद करण्यात आल्या असून, प्रशासनाकडून समाधानकारक तोडगा न निघाल्यास ६ ऑगस्ट २०२६ रोजी सकाळी ६:०० वाजल्यापासून आपत्कालीन (Emergency) सेवांसह राज्यव्यापी बेमुदत कामबंद आंदोलन सुरू करण्यात येणार असल्याची घोषणा करण्यात आली आहे.

या पार्श्वभूमीवर इंडियन मेडिकल असोसिएशन (IMA) मलकापूर शाखेने ४ ऑगस्ट २०२६ रोजी रात्री ८:३० वाजता मलकापूर शहर पोलीस ठाण्याचे ठाणेदार यांना अधिकृत निवेदन सादर करून आंदोलनाची माहिती दिली.

महाराष्ट्रातील आरोग्य व्यवस्था आणि वैद्यकीय शिक्षणाच्या गुणवत्तेशी संबंधित विविध मुद्द्यांवर महाराष्ट्र असोसिएशन ऑफ रेसिडेंट डॉक्टर्स (MARD), इंडियन मेडिकल असोसिएशन (IMA) महाराष्ट्र राज्य, असोसिएशन ऑफ स्टेट मेडिकल इंटर्न्स (ASMI) तसेच सर्व स्पेशालिस्ट राज्य संघटनांनी एकत्र येत या संयुक्त आंदोलनाची हाक दिली आहे.

संघटनांच्या म्हणण्यानुसार, शासनाशी वारंवार सकारात्मक आणि प्रामाणिक संवाद साधण्याचा प्रयत्न करूनही प्रस्तावित BHMS-CCMP नोंदणी प्रक्रिया आणि निवासी डॉक्टरांच्या प्रलंबित मागण्यांबाबत कोणतीही ठोस, कायदेशीर आणि स्पष्ट हमी शासनाकडून मिळालेली नाही. त्यामुळे रुग्णांची सुरक्षितता आणि वैद्यकीय सेवेच्या गुणवत्तेवर परिणाम होण्याची भीती संघटनांनी व्यक्त केली आहे.

आंदोलनाचा टप्प्याटप्प्याने कार्यक्रम

५ ऑगस्ट २०२६ (रात्री १२:०० वाजल्यापासून):
IMA महाराष्ट्र राज्य शाखेच्या नेतृत्वाखाली नियमित (Elective) आणि आपत्कालीन नसलेल्या वैद्यकीय सेवा बंद आंदोलन सुरू करण्यात आले. या आंदोलनात MARD, ASMI तसेच सर्व स्पेशालिस्ट संघटनांनी पूर्ण सहभाग नोंदवला असून ५ ऑगस्टच्या मध्यरात्रीपासून नॉन-इमर्जन्सी सेवा बंद करण्यात आल्या आहेत.

६ ऑगस्ट २०२६ (सकाळी ६:०० वाजल्यापासून):
६ ऑगस्ट रोजी सकाळी ६:०० वाजेपर्यंत शासनाकडून समाधानकारक तोडगा न निघाल्यास, सकाळी ६:०० वाजल्यापासून आपत्कालीन (Emergency) वैद्यकीय सेवांचाही समावेश असलेले राज्यव्यापी बेमुदत कामबंद आंदोलन सुरू करण्यात येणार असल्याचा इशारा डॉक्टर संघटनांनी दिला आहे.

डॉक्टर संघटनांनी म्हटले आहे की, रुग्णहित आणि वैद्यकीय नैतिकतेला नेहमीच प्राधान्य देणाऱ्या डॉक्टरांना शासनाच्या निष्क्रिय भूमिकेमुळे हे कठोर पाऊल उचलावे लागत आहे. परिस्थिती आणखी गंभीर होण्यापूर्वी राज्य शासनाने तात्काळ हस्तक्षेप करून BHMS-CCMP नोंदणी प्रक्रिया स्थगित करावी तसेच निवासी डॉक्टरांच्या प्रलंबित मागण्यांवर कायदेशीर तोडगा काढावा, अशी मागणी करण्यात आली आहे.

ही मागणी IMA महाराष्ट्र राज्याचे अध्यक्ष डॉ. संतोष कुलकर्णी, राज्य सचिव डॉ. विकास देसाई, राज्य खजिनदार डॉ. अमोल गिते, MARD अध्यक्ष डॉ. अथर्व शिंदे, तसेच IMA मलकापूर शाखेच्या अध्यक्षा डॉ. जयश्री खारचे आणि सचिव डॉ. नितीन बारहाते यांच्यासह सर्व संबंधित संघटनांच्या पदाधिकाऱ्यांनी केली आहे.