डॉ. सतिष विडोळकर यांचा गौरव; भारत विभूषण सन्मान प्राप्त झाल्याबद्दल सत्कार

हिंगोली (Bharat Vibhushan Samman 2026) : तालुक्यातील नर्सी नामदेव येथील संत नामदेव संस्थानचे माजी अध्यक्ष डॉ. सतिष नरहरराव विडोळकर यांना ‘भारत विभूषण सन्मान २०२६’ या प्रतिष्ठेच्या पुरस्काराने पंजाब विधानसभेत सन्मानित करण्यात आल्याबद्दल हिंगोली येथे त्यांचा सत्कार करण्यात आला.

मध्यंतरी चंदीगड येथील पंजाब विधानसभेच्या सांस्कृतिक सभागृहात आयोजित कार्यक्रमात डॉ. सतिष विडोळकर यांना ‘भारत विभूषण सन्मान २०२६’ या पुरस्काराने गौरविण्यात आले होते. त्यांच्या या उल्लेखनीय यशाबद्दल विविध स्तरांतून अभिनंदनाचा वर्षाव होत आहे.

याच पार्श्वभूमीवर संगीतरत्न अनुराधाताई नांदेडकर, शैलेश नांदेडकर आणि सौ. श्वेता नांदेडकर यांनी डॉ. विडोळकर यांचा पुष्पगुच्छ देऊन सत्कार केला. यावेळी त्यांच्या कार्याचा गौरव करण्यात आला तसेच भविष्यातील वाटचालीसाठी शुभेच्छा देण्यात आल्या.

डॉ. विडोळकर यांना मिळालेल्या या राष्ट्रीय पातळीवरील सन्मानामुळे हिंगोली जिल्ह्यासह नर्सी नामदेव परिसरात आनंदाचे वातावरण असून विविध क्षेत्रांतून त्यांचे अभिनंदन करण्यात येत आहे.