मुख्यमंत्री बळीराजा शेत पांदण रस्ता योजनेच्या कारंजा-मानोरा विधानसभा क्षेत्राच्या सह अध्यक्षपदी पोहरादेवी भाजपा मंडळाचे तालुका अध्यक्ष गणेश जाधव यांची नियुक्ती करण्यात आली आहे.
मानोरा : मुख्यमंत्री बळीराजा शेत पांदण रस्ता योजनेच्या कारंजा-मानोरा विधानसभा क्षेत्राच्या सह अध्यक्षपदी पोहरादेवी भाजपा मंडळाचे तालुका अध्यक्ष गणेश जाधव यांची नियुक्ती करण्यात आली आहे. नुकतेच आमदार सईताई डहाके यांच्या हस्ते मान्यवरांच्या उपस्थितीत नवनियुक्त सह अध्यक्ष गणेश जाधव यांना नियुक्तीपत्र प्रदान करण्यात आले.
महायुती सरकारने शेतकऱ्यांना शेतापर्यंत बारमाही रस्ता उपलब्ध करून देण्यासाठी मुख्यमंत्री बळीराजा शेत पांदण रस्ता योजना सुरू केली आहे. या योजनेच्या प्रभावी अंमलबजावणीस गती देण्याच्या उद्देशाने विविध स्तरांवर नियुक्त्या करण्यात येत असून, त्याच अनुषंगाने गणेश जाधव यांच्यावर सह अध्यक्षपदाची जबाबदारी सोपविण्यात आली आहे.
तालुक्यात शेत पांदण रस्त्यांचे जाळे मजबूत झाल्यास शेतकऱ्यांच्या शेतमालाची वाहतूक अधिक सुलभ होणार असून, कृषी कामांना गती मिळण्यासह ग्रामीण अर्थव्यवस्थेलाही नवी चालना मिळणार आहे. या महत्त्वाच्या जबाबदारीसाठी भाजपा पोहरादेवी मंडळाचे अध्यक्ष गणेश जाधव यांची निवड झाल्याबद्दल आमदार सईताई डहाके व आमदार बाबूसिंग महाराज राठोड यांनी त्यांचे स्वागत करून सत्कार केला.
शासनाने सोपविलेल्या जबाबदारीची जाणीव ठेवून कृषी क्षेत्रातील कामांना गती देण्यासाठी आणि शेतकऱ्यांना न्याय मिळवून देण्यासाठी सर्वांना सोबत घेऊन प्रामाणिकपणे कार्य करत राहणार असल्याचा विश्वास नवनियुक्त सह अध्यक्ष गणेश जाधव यांनी यावेळी व्यक्त केला.
यावेळी गोलू डहाके, भाजपा प्रदेश सह संयोजक भक्तराज महाराज, मानोरा तालुका सरचिटणीस राजू देशमुख, प्रवीण धोटे, जिल्हा कार्यकारिणी सदस्य डॉ. अरविंद यावलकर, वैद्यकीय असोसिएशनचे जिल्हाध्यक्ष डॉ. अविनाश लोथे, सामील राठोड यांच्यासह भाजपा पदाधिकारी व कार्यकर्ते मोठ्या संख्येने उपस्थित होते.