ॲपल स्मार्ट ग्लास: टेक क्षेत्रातील दिग्गज ॲपल आपल्या आगामी स्मार्ट ग्लासेसद्वारे केवळ मेटा कंपनीलाच नव्हे, तर संपूर्ण चष्मा उद्योगात क्रांती घडवण्यासाठी सज्ज होत आहे. या नवीन उत्पादनासाठी कंपनीची रणनीती अगदी तशीच आहे जशी 'ॲपल वॉच' लाँच करताना होती. जेव्हा ॲपल वॉच बाजारात आले, तेव्हा त्याची स्पर्धा केवळ पेबल किंवा मोटोरोलासारख्या टेक कंपन्यांशीच नव्हे, तर स्वॉच, फॉसिल आणि सेकोसारख्या प्रसिद्ध घड्याळ ब्रँड्सशीही होती. आता, ॲपल आपल्या स्मार्ट ग्लासेसद्वारे २०० ते ५०० डॉलर (अंदाजे ₹१६,५०० ते ₹४१,०००) या सेगमेंटमध्ये ओकले आणि रे-बॅनसारख्या प्रस्थापित ब्रँड्सशी थेट स्पर्धा करण्याची योजना आखत आहे.
जागतिक चष्म्यांची बाजारपेठ घड्याळांपेक्षा मोठी आहे.
मॉडर्न इंटेलिजन्स या बाजार संशोधन संस्थेच्या अहवालानुसार, जागतिक घड्याळ बाजारपेठेचे मूल्य सुमारे १३२ अब्ज डॉलर्स असण्याचा अंदाज आहे. त्या तुलनेत, चष्म्यांचा उद्योग खूपच मोठा असून, त्याची वार्षिक उलाढाल १८० ते २०० अब्ज डॉलर्सच्या दरम्यान आहे. तथापि, ॲपल या बाजारपेठेतील उच्चभ्रू लक्झरी विभागाला लक्ष्य करत नाही. यापूर्वी, कंपनीने १०,००० डॉलर्स (अंदाजे ८.३ लाख रुपये) किमतीचे सोन्याचे ॲपल वॉच बाजारात आणून लक्झरी बाजारपेठेत आपले नशीब आजमावले होते, परंतु त्याला अपेक्षित यश मिळाले नाही.
स्मार्ट ग्लासेससाठी ॲपलची 'वॉच फॉर्म्युला' रणनीती
मागील चुकांमधून शिकून, ऍपल या वेळी आपल्या स्मार्ट ग्लासेससाठी सर्वसामान्य ग्राहकांवर लक्ष केंद्रित करत आहे. कंपनीला विश्वास आहे की तिचे मजबूत ब्रँड मूल्य, आकर्षक औद्योगिक डिझाइन आणि आयफोनसोबतची सुलभ कनेक्टिव्हिटी ग्राहकांना आकर्षित करेल. जे लोक सामान्य चष्मा घेण्याचा विचार करत आहेत, ते त्याच्या स्मार्ट वैशिष्ट्यांमुळे ऍपल ग्लासेसकडे वळण्याची शक्यता आहे. याशिवाय, या ग्लासेसमध्ये आर्टिफिशियल इंटेलिजन्सची (AI) वैशिष्ट्ये देखील उपलब्ध असतील, जी वापरकर्त्यांना त्यांच्या सभोवतालच्या जगाशी डिजिटल पद्धतीने संवाद साधण्यास मदत करतील. ही AI क्षमता ऍपलच्या या आगामी उत्पादनाला अधिक आकर्षक आणि लोकप्रिय बनवेल.