आपसी संमतीने वेगळे होण्याचा निर्णय; प्रायव्हसीचा आदर करण्याचे माध्यमे आणि चाहत्यांना आवाहन
मराठी चित्रपटसृष्टीतील लोकप्रिय अभिनेता-निर्माता आदिनाथ कोठारे आणि अभिनेत्री ऊर्मिला कानेटकर यांनी वैवाहिक आयुष्याबाबत मोठा निर्णय जाहीर केला आहे. गेल्या काही दिवसांपासून त्यांच्या नात्याबाबत विविध चर्चा सुरू असताना, दोघांनीही सोशल मीडियावर अधिकृत निवेदन प्रसिद्ध करून आपसी संमतीने आणि सामंजस्याने घटस्फोट घेत असल्याची माहिती दिली. त्यांच्या या घोषणेमुळे चाहत्यांसह संपूर्ण मनोरंजन विश्वाला मोठा धक्का बसला आहे.
आदिनाथ आणि ऊर्मिला यांनी त्यांच्या सोशल मीडिया पोस्टमध्ये म्हटले आहे की, "खूप विचार केल्यानंतर आम्ही एकमेकांच्या संमतीने आणि सामंजस्याने पती-पत्नी म्हणून वेगळे होण्याचा निर्णय घेतला आहे." त्यांनी स्पष्ट केले की, पती-पत्नी म्हणून त्यांचा प्रवास येथे संपत असला तरी, एकमेकांविषयीचा आदर आणि एकत्र घालवलेल्या वर्षांच्या आठवणी कायम राहतील.
दोघांनी त्यांच्या मुलगी जिजा हिचा विशेष उल्लेख करत, आई-वडील म्हणून आपली जबाबदारी पूर्वीप्रमाणेच पार पाडणार असल्याचे सांगितले आहे. "जिजा आमचं सर्वस्व आहे. तिला प्रेम, सुरक्षितता आणि पाठिंबा मिळावा यासाठी आम्ही पूर्ण जबाबदारीने Co-parenting करत आहोत," असे त्यांनी निवेदनात नमूद केले आहे.
याशिवाय, गेल्या अनेक वर्षांत माध्यमे, हितचिंतक आणि चाहत्यांनी दिलेल्या प्रेमाबद्दल दोघांनी कृतज्ञता व्यक्त केली आहे. आयुष्याच्या नव्या टप्प्यातही सर्वांचे आशीर्वाद कायम राहावेत, अशी अपेक्षा व्यक्त करत त्यांनी माध्यमे आणि जनतेला त्यांच्या प्रायव्हसीचा आदर करण्याची नम्र विनंती केली आहे. तसेच, या विषयावरील हेच त्यांचे एकमेव अधिकृत वक्तव्य असेल आणि यापुढे कोणतीही प्रतिक्रिया किंवा चर्चा केली जाणार नसल्याचे त्यांनी स्पष्ट केले आहे.
गेल्या काही दिवसांपासून आदिनाथ कोठारे आणि ऊर्मिला कानेटकर यांच्या घटस्फोटाच्या चर्चा सुरू होत्या. मात्र, यापूर्वी दोघांनीही त्यावर कोणतेही अधिकृत भाष्य केले नव्हते. अखेर सोशल मीडियावरील संयुक्त निवेदनातून त्यांनी या चर्चांना पूर्णविराम दिला.
आदिनाथ कोठारे हे ज्येष्ठ अभिनेते, निर्माते आणि दिग्दर्शक महेश कोठारे यांचे सुपुत्र आहेत. आदिनाथ आणि ऊर्मिला यांच्यातील मैत्रीचे प्रेमात रूपांतर झाले आणि 2011 मध्ये दोघांनी विवाह केला. त्यानंतर 2017 मध्ये त्यांच्या घरी मुलगी जिजा हिचा जन्म झाला. जवळपास 15 वर्षांच्या वैवाहिक आयुष्यानंतर आता या दोघांनी वेगळे होण्याचा निर्णय जाहीर केला असून, मुलगी जिजाच्या संगोपनासाठी मात्र ते एकत्र राहणार असल्याचे स्पष्ट केले आहे.
