LPG ग्राहकांसाठी मोठी सूचना! १५ ऑगस्टपूर्वी e-KYC पूर्ण करा; अन्यथा रिफिल बुकिंग आणि सिलेंडरवर होऊ शकतो परिणाम

गॅस कंपन्यांचे घरगुती कनेक्शनधारकांना आवाहन; वेळेत e-KYC न केल्यास व्यावसायिक दराने सिलेंडर घ्यावा लागू शकतो

देशभरातील घरगुती LPG गॅस ग्राहकांसाठी गॅस कंपन्यांनी महत्त्वाचे आवाहन केले आहे. सर्व घरगुती गॅस कनेक्शनधारकांनी १५ ऑगस्टपूर्वी e-KYC प्रक्रिया पूर्ण करावी, असे निर्देश देण्यात आले आहेत. निर्धारित मुदतीत ही प्रक्रिया पूर्ण न झाल्यास ग्राहकांना घरगुती सिलेंडरऐवजी व्यावसायिक (Commercial) दराने सिलेंडर घ्यावा लागू शकतो किंवा गॅस रिफिल बुकिंग करताना अडचणी निर्माण होण्याची शक्यता व्यक्त करण्यात आली आहे.

गॅस कंपन्यांच्या माहितीनुसार, e-KYC मोहिमेचा मुख्य उद्देश प्रत्येक गॅस कनेक्शनची अचूक पडताळणी करणे, बनावट किंवा अनधिकृत कनेक्शन रोखणे आणि सरकारी अनुदान योग्य लाभार्थ्यांपर्यंत पोहोचेल याची खात्री करणे हा आहे. याच पार्श्वभूमीवर सर्व वितरकांना १५ ऑगस्टपर्यंत जास्तीत जास्त ग्राहकांचे e-KYC पूर्ण करण्याचे निर्देश देण्यात आले आहेत.

अनेक भागांमध्ये अद्याप मोठ्या प्रमाणावर ग्राहकांनी e-KYC केलेले नसल्याचे समोर आले आहे. त्यामुळे गॅस एजन्सींकडून ग्राहकांना फोन कॉल, एसएमएस तसेच प्रत्यक्ष संपर्क साधून ही प्रक्रिया लवकर पूर्ण करण्याचे आवाहन करण्यात येत आहे. काही ग्राहकांना LPG Refill Booking तात्पुरते ब्लॉक होऊ शकते, अशा आशयाचे संदेशही मोबाईलवर मिळत असल्याची माहिती समोर आली आहे.

e-KYC कशी पूर्ण कराल?

ग्राहक आपल्या जवळच्या गॅस एजन्सीमध्ये जाऊन किंवा संबंधित गॅस कंपनीच्या अधिकृत ऑनलाइन सुविधेचा वापर करून e-KYC प्रक्रिया पूर्ण करू शकतात. यासाठी आधार कार्ड, नोंदणीकृत मोबाईल क्रमांक तसेच आवश्यक ओळखपत्रांची पडताळणी केली जाते. प्रक्रिया पूर्ण झाल्यानंतर संबंधित गॅस कनेक्शनची माहिती अद्ययावत केली जाते.

गॅस कंपन्या आणि वितरकांनी सर्व ग्राहकांना १५ ऑगस्टपूर्वी e-KYC पूर्ण करण्याचे आवाहन केले असून, भविष्यातील गैरसोय टाळण्यासाठी ही प्रक्रिया वेळेत पूर्ण करण्याचा सल्ला दिला आहे.