आष्टीतील मिसबाह फातिमाची विज्ञान शाखेत जिल्ह्यात बाजी
आष्टी (Wardha Topper) : जिद्द, चिकाटी आणि अथक परिश्रमांच्या जोरावर कोणत्याही अडचणींवर मात करता येते, याचे जिवंत उदाहरण म्हणजे आष्टी येथील हुतात्मा राष्ट्रीय विद्यालय तथा कनिष्ठ महाविद्यालयातील विद्यार्थिनी कु. मिसबाह नियाजी फातिमा होय. बारावीच्या विज्ञान शाखेच्या निकालात तिने 95.67 टक्के गुण मिळवत वर्धा जिल्ह्यात प्रथम क्रमांक पटकावला आहे. विशेष म्हणजे जीवशास्त्र विषयात 100 पैकी 100 गुण मिळवत तिने आपल्या गुणवत्तेची ठळक छाप पाडली असून संपूर्ण परिसरात तिच्या यशाचे कौतुक होत आहे.
जिद्दीची कमाल; 95.67 टक्क्यांसह विज्ञान शाखेत प्रथम
मिसबाहचा परिवार अत्यंत साधा आहे. आई-वडील आणि दोन बहिणी असे तिचे कुटुंब असून ते आजही तीन खोल्यांच्या कवेलूच्या घरात वास्तव्यास आहेत. तिचे वडील हाताला मिळेल ते काम करून कुटुंबाचा उदरनिर्वाह करतात. अशा प्रतिकूल परिस्थितीत कोणतीही खाजगी शिकवणी न लावता, केवळ स्वतःच्या जिद्दीवर आणि शिक्षकांच्या मार्गदर्शनावर तिने हे यश संपादन केले.
महाविद्यालयातील नियमित उपस्थिती, सातत्यपूर्ण अभ्यास आणि शिक्षकांचे मार्गदर्शन या त्रिसूत्रीच्या बळावर मिसबाहने ही उल्लेखनीय कामगिरी साध्य केली. तिच्या यशामागे आई-वडील तसेच शिक्षकवृंद यांचे मोलाचे योगदान आहे.
तिच्या या यशाबद्दल महाविद्यालयाचे प्राचार्य पी. जी. नागतोडे, उपमुख्याध्यापिका विणा तांबसकर, पर्यवेक्षक सुनील ईखार तसेच सागर सव्वालाखे आणि शिक्षकवृंद यांनी तिच्या घरी जाऊन तिचा व तिच्या पालकांचा सत्कार केला.
तसेच हुतात्मा स्मारक समितीचे अध्यक्ष राहुल ठाकरे, सचिव विनायकराव होले, उपाध्यक्ष डॉ. किशोर गंजीवाले, सहसचिव भरत वणझरा, कोषाध्यक्ष शंकरराव नागपुरे तसेच सदस्य राजाभाऊ सव्वालाखे व अर्पित मालपे यांनी तिचे अभिनंदन करून पुढील वाटचालीस शुभेच्छा दिल्या.
