शिवरायांच्या रयतेच्या कल्याणाचा विचार घेऊन देवाभाऊंचे सरकार शेतकऱ्यांच्या पाठीशी: आ. श्वेता महाले पाटील

चिखली (MLA Shweta Mahale Patil) : “छत्रपती शिवाजी महाराजांचा रयतेच्या कल्याणाचा विचार सदैव स्मरणात ठेवूनच देवाभाऊंचे सरकार शेतकरी आणि सर्वसामान्य जनतेच्या पाठीशी खंबीरपणे उभे आहे. संकटाच्या काळात जनतेला आधार देणे आणि त्यांच्या अडचणी सोडविणे ही शासनाची जबाबदारी आहे,” असे प्रतिपादन चिखली विधानसभा मतदारसंघाच्या आमदार श्वेता महाले पाटील (MLA Shweta Mahale Patil) यांनी केले.

चिखली विधानसभा मतदारसंघातील मौजे इसोली येथे गावकऱ्यांच्या पुढाकारातून हिंदवी स्वराज्याचे संस्थापक, आराध्य दैवत छत्रपती शिवाजी महाराज यांच्या पुतळ्याचे अनावरण व पूजन सोहळा 18 सप्टेंबर रोजी उत्साहात पार पडला. आमदार श्वेता महाले पाटील (MLA Shweta Mahale Patil) यांच्या हस्ते पुतळ्याचे अनावरण व पूजन करण्यात आले. यावेळी शिवप्रेमी, युवक, महिला तसेच ग्रामस्थ मोठ्या संख्येने उपस्थित होते.

यावेळी शेतकरी बांधवांशी संवाद साधताना आमदार महाले पाटील यांनी छत्रपती शिवाजी महाराजांच्या रयतेच्या कल्याणाचा विचार पुढे नेत जनतेच्या अडचणी सोडविण्यासाठी शासन कटिबद्ध असल्याचे सांगितले. सध्याच्या दुष्काळसदृश परिस्थितीत शेतकऱ्यांनी चिंता करू नये, शासन त्यांच्या पाठीशी असल्याचा विश्वास त्यांनी व्यक्त केला. सध्याच्या परिस्थितीच्या पार्श्वभूमीवर ज्या-ज्या ठिकाणी पीक पाहणीची आवश्यकता आहे, त्या ठिकाणी पंचनामे करण्याचे आदेश देण्यात आले आहेत. पंचनामे व्यवस्थित आणि वस्तुनिष्ठ पद्धतीने होणे आवश्यक असून, शेतकऱ्यांनी कोणत्याही भूलथापांना बळी पडू नये. सर्व पंचनामे पूर्ण झाल्यानंतर राज्य सरकार शेतकऱ्यांना निश्चितपणे न्याय देईल, असेही आमदार महाले पाटील यांनी स्पष्ट केले.

मुख्यमंत्री देवेंद्र फडणवीस यांच्या नेतृत्वाखाली विदर्भाच्या विकासाला विशेष महत्त्व दिले जात असल्याचे नमूद करत त्यांनी शेतीच्या सिंचनासाठी महत्त्वपूर्ण असलेल्या वैनगंगा-नळगंगा नदीजोड प्रकल्पाला मंजुरी मिळाल्याचा उल्लेख केला. सिंचनाच्या माध्यमातून शेतीला स्थैर्य मिळावे आणि शेतकऱ्यांच्या अडचणी कमी व्हाव्यात, यासाठी शासनाच्या विविध पातळ्यांवर प्रयत्न सुरू असल्याचे त्यांनी सांगितले.

इसोली येथील छत्रपती शिवाजी महाराजांच्या पुतळा अनावरणाचा सोहळा हा केवळ स्मारकाच्या लोकार्पणापुरता मर्यादित न राहता शिवरायांच्या विचारांची प्रेरणा घेऊन समाज आणि जनतेच्या कल्याणासाठी काम करण्याचा संकल्प अधोरेखित करणारा ठरला. शिवप्रेमी आणि युवकांच्या उत्स्फूर्त सहभागामुळे कार्यक्रमाला विशेष वातावरण निर्माण झाले.

यावेळी संजय गाडेकर, बळीराम काळे, रामेश्वर कोकाटे, विनोद सीताफळे, शिवा भागवत, डॉ. राजेंद्र दिघे, राजू कोकाटे, माणिकराव कोकाटे, डॉ. रईस, राम शेळके, विशाल देशमुख, ज्येष्ठ मंडळीतील किसनमामा कोकाटे, बाळूभाऊ शेळके, रामेश्वर खपके, राजूभाऊ दिघे, सरपंच रईस माणिकराव खरात, लालाजी शेळके, दामू येवले, अनंता शेळके, सुनील शेळके, गोविंद येवले, देवानंद शेळके, महाराज श्याम शेळके, बाळू निकम, आत्माराम घनघाव, गणेश दिघे, प्रकाश लागे, प्रकाश येवले, बद्री येवले, ज्ञानेश्वर सीताफळे, शरद बाठे यांच्यासह शिवप्रेमी, युवक, महिला व ग्रामस्थ मोठ्या संख्येने उपस्थित होते.