जवळाबाजार येथे बस-दुचाकीच्या धडकेत तरुण ठार, चालक फरार

जवळाबाजार (Bus-Bike Accident) : औंढा नागनाथ-परभणी मार्गावर जवळाबाजार शिवारात रविवारी सकाळी साडेदहा वाजण्याच्या सुमारास भरधाव एसटी बस व दुचाकीच्या समोरासमोर धडकेत 25 वर्षीय तरुणाचा जागीच मृत्यू झाला. गजानन दत्तराव कदम (रा. वगरवाडी, ता. औंढा नागनाथ) असे मृत तरुणाचे नाव आहे.

गजानन कदम शेती करीत होता. आज जवळाबाजार येथे आठवडी बाजार असल्याने तो सकाळी दुचाकीने बाजारासाठी आला होता. काम आटोपून वगरवाडीकडे परतत असताना जवळाबाजारपासून काही अंतरावर हिंगोलीहून परभणीकडे जाणाऱ्या एसटी बसने त्याच्या दुचाकीला जोरदार धडक दिली. अपघातात गजानन रस्त्यावर कोसळला आणि डोक्याला गंभीर मार लागल्याने त्याचा जागीच मृत्यू झाला.

अपघातानंतर (Bus-Bike Accident) बस चालकाने बस जागेवरच सोडून पळ काढला. घटनेची माहिती मिळताच वगरवाडी येथील ग्रामस्थ व औंढा नागनाथ पोलिस ठाण्याचे सहाय्यक पोलिस निरीक्षक कैलास भगत, जमादार दिलीप नाईक, जमादार राजू ठाकूर, रवीकांत हरकाळ,महामार्ग पोलीस चे खयामुद्दीन खतीब व राजाराम कदम हेही उपस्थित होते .खाजगी रुग्णवाहिकेचा चालक सुनील वाघमारे यांनी मृतदेहाचे मेंदूचे अवयव गोळा करण्यास मदत केली. पोलिसांनी पंचनामा करून मृतदेह उत्तरीय तपासणीसाठी जवळाबाजार प्राथमिक आरोग्य केंद्रात पाठवला. 

पोलिसांनी बस जप्त केली असून फरार बस चालकाला ताब्यात घेतले जाणार असल्याचे सांगितले. गजाननच्या अकाली निधनाने वगरवाडी गावावर शोककळा पसरली आहे.