मांत्रिकाकडे गेल्याने उपचारासाठी झाला विलंब
आरोग्य यंत्रणेने रुग्णालयात दाखल होण्यास केला होता आग्रह
कोरची (Korachi Mother-Child Deaths) : कोरची तालुक्यातील अंधश्रद्धा बुवाबाजी आदी बाबींमुळे रुग्णांचा जीव धोक्यात आला असून, रुग्णालयात दाखल न होता मांत्रिकाकडे गेल्यामुळे आणखी एका मातेचा नवजात बाळासह मृत्यू झाल्याची घटना उघडकीस आली आहे. आरोग्य यंत्रणेने रुग्णालयात दाखल होण्यासाठी प्रयत्न करूनही वेळेवर गर्भवती माता रुग्णालयात दाखल झाली नसल्याची माहिती प्राप्त झाली आहे.
त्यामुळे हुडूकदुमा येथील 24 वर्षीय गर्भवती रमुला महेश काटेन्गे हिचा नवजात बालिकेसह मृत्यू झाल्याची दुर्दैवी घटना घडली आहे. मिळालेल्या माहितीनुसार, कोरचीपासून सुमारे 17 किमी अंतरावरील हुडूकदुमा गावातील रमुला काटेन्गे हिला प्रसूती वेदना सुरू झाल्यानंतर तिच्या पतीने आशा वर्करला संपर्क साधला. रुग्णाची परिस्थिती गंभीर झाल्यानंतर सकाळी 102 क्रमांकाची रुग्णवाहिका बोलावून तिला कोरची ग्रामीण रुग्णालयात दाखल करण्यात आले. रुग्णालयात डॉक्टर उके व डॉक्टर ईटणकर यांनी प्रसूती केली. सुरुवातीला रमूला यांना मांत्रिकाकडे नेल्यामुळे वैद्यकीय उपचारास विलंब झाल्याची माहिती प्राप्त झाली आहे.
विलंबाने रुग्णालयात उपचारार्थ दाखल केल्यानंतर रमुलाने एका मुलीला जन्म दिला. मात्र ऑक्सिजनच्या कमतरतेमुळे आई आणि बाळ दोघांनाही वाचवता आले नाही, अशी माहिती डॉक्टरांनी दिली. दरम्यान, कोरची तालुक्यातील अंधश्रद्धाबाबत कायमच प्रश्नचिन्ह राहिले असून, यापूर्वीही अशा प्रकारच्या माता-बाल मृत्यूच्या (Korachi Mother-Child Deaths) घटना घडल्या आहेत.
तसेच 102 रुग्णवाहिकेत ऑक्सिजन व डॉक्टरांची सुविधा नसल्याने गंभीर रुग्णांना उपचारासाठी नेताना मोठा धोका निर्माण होत असल्याचेही समोर आले आहे. या (Korachi Mother-Child Deaths) सर्व प्रकारामुळे कोरची तालुक्यातील आरोग्य यंत्रणेवर प्रश्नचिन्ह उपस्थित झाले असून संबंधित प्रशासनाने तातडीने दखल घेण्याची मागणी होत आहे.
