वार्ड क्र. १६ मध्ये धक्कादायक प्रकार; मागील वर्षी वार्ड क्र. ४ मध्येही नळातून नाळू निघाल्याचा प्रकार — तक्रारी, मोर्चे करूनही उपाययोजना नाहीत?
कोरची : नगरपंचायतीच्या पाणीपुरवठ्याच्या स्वच्छतेचा प्रश्न पुन्हा ऐरणीवर आला आहे. वार्ड क्रमांक १६ मध्ये मदीना मोहुर्ले यांच्या घराजवळील नगरपंचायतीच्या नळातून एक मीटरपेक्षा अधिक लांबीचा नाळू निघाल्याचा धक्कादायक प्रकार समोर आला आहे. त्यामुळे परिसरातील नागरिकांमध्ये भीतीचे वातावरण निर्माण झाले असून, नळाचे पाणी नेमके किती सुरक्षित आहे, असा गंभीर प्रश्न उपस्थित झाला आहे.
विशेष म्हणजे, मागील वर्षीही वार्ड क्रमांक ४ मध्ये नगरपंचायतीच्या नळातून असाच नाळू निघाल्याचा प्रकार घडला होता. वर्ष उलटूनही प्रशासनाने यातून धडा घेतला नाही का, असा सवाल नागरिकांकडून उपस्थित केला जात आहे.
नळाचे पाणी आरोग्याच्या दृष्टीने पिण्यायोग्य नसल्याच्या तक्रारी नागरिकांनी नगरपंचायतीकडे अनेकदा केल्या. निवेदने देण्यात आली, मोर्चे काढण्यात आले; मात्र पाणीपुरवठा व्यवस्थेत ठोस सुधारणा झालेली नसल्याचा आरोप नागरिकांनी केला आहे.
एकीकडे नागरिकांच्या नळातून प्रत्यक्ष नाळू निघत असल्याचे प्रकार समोर येत असताना, नगरपंचायतीकडून जिल्हाधिकाऱ्यांना गावात शुद्ध व पिण्यायोग्य पाणीपुरवठा केला जात असल्याची माहिती देण्यात आल्याचे सांगितले जाते. त्यामुळे नगरपंचायतीचा दावा आणि नागरिकांचा अनुभव यामध्ये नेमके सत्य काय, असा सवाल आता अधिक तीव्र झाला आहे.
नळातून नाळू निघतोय की ‘शुद्ध पाण्या’चा दावा? या प्रश्नाचे उत्तर नगरपंचायतीने नागरिकांसमोर द्यावे, अशी मागणी होत आहे. पाण्याचे नमुने तातडीने प्रयोगशाळेत तपासावेत, तसेच जलवाहिनी आणि पाण्याच्या टाक्यांची स्वच्छता व देखभाल तपासावी, अशी मागणी नागरिकांकडून होत आहे.
