सरसकट कर्जमाफीसाठी गोरेगावात शेतकऱ्यांचा संताप; मुख्यमंत्र्यांच्या प्रतीकात्मक पुतळ्याचे दहन

गोरेगाव/ हिंगोली (Farmers' Loan Waiver Andolan) : कर्जमाफीच्या जीआरमधील जाचक अटी रद्द करून सरसकट व विनाअट कर्जमाफीच्या मागणीसाठी हिंगोली जिल्ह्यातील गोरेगाव येथे सोमवार १६ जून रोजी शेतकऱ्यांनी तीव्र आंदोलन छेडले. शासनाच्या धोरणांविरोधात संताप व्यक्त करत आंदोलकांनी मुख्यमंत्री देवेंद्र फडणवीस यांच्या प्रतीकात्मक पुतळ्याला जोडे मारून त्याचे दहन केले. 

शेतकरी नेते रविकांत तुपकर यांनी बुलढाणा येथे सुरू केलेल्या अन्नत्याग आंदोलनाला पाठिंबा देण्यासाठी गोरेगावातील हे आंदोलन करण्यात आले. शासनाने जाहीर केलेल्या कर्जमाफीच्या जीआरमधील अटी तात्काळ रद्द कराव्यात आणि सर्व शेतकऱ्यांना कोणतीही अट न ठेवता कर्जमाफी द्यावी, ही आंदोलकांची प्रमुख मागणी होती. 

यावेळी 'एक रुपयात पीक विमा' योजना पूर्ववत सुरू करावी आणि शेतकऱ्यांना तातडीने न्याय द्यावा, अशा (Farmers' Loan Waiver Andolan) घोषणांनी परिसर दणाणून गेला. आंदोलनात क्रांतिकारी शेतकरी संघटनेचे गजानन कावरखे, नामदेव पतंगे, सतीश इढोळे, प्रवीण मते, मनोहर सावके यांच्यासह परिसरातील मोठ्या संख्येने शेतकरी सहभागी झाले होते. 

राज्य सरकारने शेतकरी नेते रविकांत तुपकर यांच्या आंदोलनाची तातडीने दखल घेऊन सरसकट कर्जमाफीचा निर्णय जाहीर करावा, अन्यथा राज्यभरातील आंदोलन अधिक तीव्र केले जाईल, असा इशारा आंदोलनकर्त्या शेतकऱ्यांनी यावेळी दिला.