AC आणि नॉन-एसी प्रवाशांसाठी स्वतंत्र वेळापत्रक; आरक्षण काउंटवरील गर्दी कमी करण्यासाठी नवीन व्यवस्था लागू
नवी दिल्ली : तत्काळ (Tatkal) रेल्वे तिकीट आरक्षण करणाऱ्या प्रवाशांसाठी भारतीय रेल्वेने महत्त्वाचा बदल लागू करण्याचा निर्णय घेतला आहे. १ ऑगस्टपासून तत्काळ तिकीट बुकिंगसाठी नवीन टोकन प्रणाली सुरू करण्यात येणार असून, यामुळे आरक्षण काउंटरवरील गर्दी कमी होण्यास मदत होणार आहे. तसेच प्रवाशांना वारंवार काउंटरवर ये-जा करण्याची गरजही कमी होईल.
नव्या व्यवस्थेनुसार एसी तत्काळ तिकिटांसाठी सकाळी ८.३० ते ९.०० या वेळेत टोकनचे वितरण केले जाईल. तर नॉन-एसी (स्लीपर) तत्काळ तिकिटांसाठी सकाळी ९.०० ते ९.३० या कालावधीत टोकन दिले जाणार आहेत. त्यामुळे बुकिंग सुरू होण्यापूर्वीच प्रवाशांना त्यांचा क्रमांक निश्चित होईल.
रेल्वे प्रशासनाने प्रत्येक आरक्षण काउंटरसाठी टोकनची मर्यादाही निश्चित केली आहे. त्यानुसार एसी तत्काळ तिकिटांसाठी प्रत्येक काउंटरवर १० टोकन, तर नॉन-एसी तत्काळ तिकिटांसाठी १५ टोकन उपलब्ध करून दिले जातील.
स्वतःसाठी किंवा कुटुंबातील सदस्यांसाठी तत्काळ तिकीट आरक्षित करणाऱ्या प्रवाशांना या प्रक्रियेत प्राधान्य दिले जाणार आहे. आवश्यक वाटल्यास कुटुंबीयांशी नाते सिद्ध करणारा वैध पुरावा सादर करावा लागू शकतो. त्यानंतर इतर प्रवाशांच्या बुकिंगची प्रक्रिया राबवली जाईल.
या बदलामुळे टोकन मिळवण्यासाठी आणि नंतर तिकीट बुकिंगसाठी दोनदा आरक्षण काउंटरवर जाण्याची पूर्वीची गरज संपुष्टात येणार आहे. टोकन आधीच उपलब्ध झाल्यामुळे वेळेची बचत होण्याबरोबरच आरक्षण केंद्रांवरील गर्दीवरही नियंत्रण मिळवणे शक्य होईल.
दरम्यान, तत्काळ तिकीट आरक्षित करण्यासाठी आरक्षण काउंटरवर जाताना आधार कार्ड किंवा अन्य वैध फोटो ओळखपत्र सोबत ठेवणे आवश्यक आहे. तसेच प्रवाशांची नावे, वय आणि प्रवासाशी संबंधित माहिती आधीच तयार ठेवल्यास बुकिंग प्रक्रिया अधिक वेगाने पूर्ण होऊ शकते.
