जंतर मंतर आंदोलनातील जखमी विद्यार्थी साहिल लोचवला घेऊन पोहोचले राहुल गांधी; FIR दाखल होईपर्यंत न हटण्याचा इशारा
जंतर मंतर येथील विद्यार्थी आंदोलनादरम्यान झालेल्या पेलेट गनच्या वापराचा मुद्दा पुन्हा एकदा चर्चेत आला आहे. या प्रकरणाच्या तपासाबाबत काँग्रेस नेते राहुल गांधी यांनी दिल्ली पोलिसांकडे थेट जाब विचारला. आज त्यांनी दिल्लीतील पार्लमेंट स्ट्रीट पोलीस ठाणे आणि DCP कार्यालयाला भेट देत कारवाईची माहिती घेतली. मात्र, FIR दाखल करण्यात आलेली नसल्याने राहुल गांधी यांनी DCP कार्यालयाबाहेर ठिय्या आंदोलन सुरू केले.
या भेटीदरम्यान पेलेट गनच्या वापरामुळे जखमी झालेला विद्यार्थी साहिल लोचव यालाही राहुल गांधी सोबत घेऊन गेले होते. त्यांनी दिल्ली पोलिसांकडून आतापर्यंत झालेल्या तपासाची माहिती घेतली. तसेच या प्रकरणात कोणती कारवाई करण्यात आली, याबाबतही पोलिसांना प्रश्न विचारले.
Congress leader Priyanka Gandhi has also joined Rahul Gandhi's dharna outside the DCP office, standing alongside the pellet gun victim Sahil as police reportedly refuse to register an FIR.
— VIZHPUNEET (@vizhpuneet) August 21, 2026
Amit Shah must resign !! ✊ pic.twitter.com/qDhkYbqwcs
राहुल गांधी यांनी FIR दाखल करण्याची मागणी लावून धरली. जोपर्यंत या प्रकरणात FIR नोंदवली जात नाही, तोपर्यंत आपण घटनास्थळावरून जाणार नसल्याचे त्यांनी स्पष्ट केले. त्यानंतर त्यांनी DCP कार्यालयाबाहेर ठिय्या आंदोलन सुरू केले.
जंतर मंतर आंदोलनात पेलेट गनच्या वापराचा आरोप
२० जुलै रोजी दिल्लीतील जंतर मंतर येथे कॉक्रोच जनता पार्टीच्या वतीने NEET पेपरफुटीच्या विरोधात आंदोलन करण्यात आले होते. या आंदोलनात देशभरातील मोठ्या संख्येने तरुण सहभागी झाले होते. आंदोलकांना पांगवताना दिल्ली पोलिसांनी पेलेट गनचा वापर केल्याचा आरोप आहे. या कारवाईत अनेक विद्यार्थी जखमी झाल्याचे सांगण्यात आले असून, काही जखमी विद्यार्थ्यांवर अद्याप रुग्णालयात उपचार सुरू असल्याचा दावा करण्यात आला आहे.
NEET पेपरफुटीसह अन्य परीक्षांच्या प्रश्नपत्रिका फुटल्याच्या घटनांनंतर विद्यार्थी संघटनांनी आंदोलनाची भूमिका घेतली होती. आंदोलनादरम्यान विद्यार्थ्यांनी तत्कालीन शिक्षणमंत्री धर्मेंद्र प्रधान यांच्या राजीनाम्याची मागणी केली होती.
सुप्रीम कोर्टाच्या समितीकडून चौकशी
पेलेट गनच्या वापरासह विद्यार्थी आंदोलकांवर झालेल्या कथित पोलिस अत्याचाराच्या आरोपांची चौकशी करण्यासाठी सुप्रीम कोर्टाने पाच सदस्यीय उच्चस्तरीय चौकशी समिती स्थापन केली आहे. माजी न्यायमूर्ती आर. सुभाष रेड्डी यांच्या अध्यक्षतेखाली ही समिती काम करणार आहे.
ही समिती २० जुलै रोजी दिल्लीतील जंतर मंतर तसेच देशाच्या इतर भागांत विद्यार्थी आंदोलकांवर झालेल्या पोलिस अत्याचार, लाठीचार्ज, गैरवर्तन, हिंसाचार आणि गंभीर दुखापतींच्या आरोपांची चौकशी करणार आहे.
दरम्यान, विद्यार्थी आंदोलकांवर पेलेट गनचा वापर झाल्याच्या मुद्द्यावर विरोधकांकडून सातत्याने प्रश्न उपस्थित केले जात आहेत. राहुल गांधी यांच्या आजच्या आंदोलनामुळे या प्रकरणात दिल्ली पोलिसांच्या तपासाची आणि FIR नोंदवण्याची मागणी पुन्हा ऐरणीवर आली आहे.
