कॉकरोच जनता पार्टी (CJP) च्या आंदोलनाला शनिवारी (6 जून 2026) दिल्लीतील जंतर-मंतर येथे सुरुवात झाली आहे.
नवी दिल्ली (Jantar Mantar Protest) : कॉकरोच जनता पार्टी (CJP) च्या आंदोलनाला शनिवारी (6 जून 2026) दिल्लीतील जंतर-मंतर येथे सुरुवात झाली असून, राजधानीतील महत्त्वाच्या ठिकाणी दिल्ली पोलीस आणि निमलष्करी दलांच्या जवानांची मोठ्या प्रमाणात तैनाती करण्यात आली आहे. अधिकाऱ्यांनी ही माहिती दिली.
दरम्यान, कॉकरोच जनता पार्टीचे संस्थापक अभिजीत दीपके अमेरिकेतून दिल्लीत दाखल झाले आहेत. दिल्लीत पोहोचल्यानंतर त्यांनी सोशल मीडिया प्लॅटफॉर्म 'एक्स'वर पोस्ट करत, "जंतर-मंतरवर सर्वांना भेटण्यास उत्सुक आहे. आपल्याला हे आंदोलन प्रेम आणि शांततेच्या मार्गाने पुढे न्यायचे आहे," असे म्हटले.
यापूर्वी अभिजीत दीपके यांनी बोस्टनहून भारतात परतत असल्याची घोषणा केली होती. परीक्षा व्यवस्थेतील कथित त्रुटींमुळे केंद्रीय शिक्षणमंत्री धर्मेंद्र प्रधान यांच्या राजीनाम्याच्या मागणीसाठी शांततापूर्ण आंदोलन सुरू करण्यात येणार असल्याचे त्यांनी स्पष्ट केले होते. शिक्षण सुधारक आणि हवामान कार्यकर्ते सोनम वांगचुक यांनीही 5 जूनपर्यंत धर्मेंद्र प्रधान यांनी राजीनामा न दिल्यास आंदोलनात सहभागी होण्याची भूमिका जाहीर केली होती.
अभिजीत दीपके जंतर-मंतरवर दाखल
दिल्ली विमानतळावर आगमनानंतर अभिजीत दीपके थेट जंतर-मंतर येथे पोहोचले. आंदोलनस्थळी त्यांच्या आगमनानंतर समर्थकांनी जोरदार घोषणाबाजी केली. आंदोलनाचे नेतृत्व स्वतः दीपके करत असून, शांततापूर्ण मार्गाने आंदोलन पुढे नेण्याचे आवाहन त्यांनी केले आहे.
जंतर-मंतरवर गर्दी; घोषणाबाजीला सुरुवात
दिल्ली पोलिसांनी परवानगी दिल्यानंतर कॉकरोच जनता पार्टीचे समर्थक मोठ्या संख्येने जंतर-मंतर येथे जमा होऊ लागले. आंदोलनस्थळावरून समोर आलेल्या दृश्यांमध्ये आंदोलनकर्ते शिक्षणमंत्री धर्मेंद्र प्रधान यांच्या राजीनाम्याची मागणी करत घोषणाबाजी करताना दिसत आहेत.
दरम्यान, आंदोलनस्थळी काही व्यक्तींनी CJP आंदोलनाच्या विरोधात घोषणाबाजी केल्यानंतर काही काळ गोंधळाचे वातावरण निर्माण झाले. परिस्थिती नियंत्रणात आणण्यासाठी पोलिसांनी संबंधित काही व्यक्तींना ताब्यात घेतल्याची माहिती समोर आली आहे.
छत्रपती संभाजीनगरातील निवासस्थानीही सुरक्षा वाढवली
अभिजीत दीपके यांच्या भारतातील आगमनाच्या पार्श्वभूमीवर महाराष्ट्रातील छत्रपती संभाजीनगर शहरातील वाळूज एमआयडीसी परिसरात असलेल्या त्यांच्या निवासस्थानीही पोलिस बंदोबस्त वाढवण्यात आला आहे.
झोन-1 चे उपायुक्त (DCP) पंकज अतुलकर यांनी सांगितले की, अनावश्यक गर्दी टाळण्यासाठी सुरक्षा व्यवस्थेत वाढ करण्यात आली आहे. "गरज भासल्यास परिस्थितीचा आढावा घेऊन अतिरिक्त मनुष्यबळ तैनात केले जाईल," असे त्यांनी म्हटले.
तसेच, अभिजीत दीपके यांचे आई-वडील सध्या वाळूज येथील घरी राहत नसल्याचेही त्यांनी स्पष्ट केले. "ते माझ्या संपर्कात नाहीत," असे सांगत त्यांनी याबाबत अधिक माहिती देण्यास नकार दिला.
वेबसाइट बंद केल्यानंतर दीपके यांची प्रतिक्रिया
कॉकरोच जनता पार्टीची वेबसाइट बंद करण्यात आल्यानंतर अभिजीत दीपके यांनी सरकारवर टीका केली होती. "सरकारला झुरळांची इतकी भीती का वाटते? मात्र या हुकूमशाही वृत्तीमुळे देशातील तरुणांचे डोळे उघडत आहेत. चांगल्या भविष्याची मागणी करणे हाच आमचा गुन्हा आहे. पण आम्हाला इतक्या सहजपणे संपवता येणार नाही. आम्ही नव्या घरावर काम करत आहोत. झुरळे कधीच मरत नाहीत," अशी प्रतिक्रिया त्यांनी 'एक्स'वरील पोस्टमध्ये दिली होती.