घटनेची माहिती मिळताच भारतीय वायुसेनेचे अग्निशामक दल तसेच आपत्कालीन बचाव पथक तातडीने घटनास्थळी दाखल झाले.
धावपट्टीवर सुरक्षित उतरल्यानंतर काही सेकंदांतच भीषण आग; बचावकार्य तातडीने सुरू, कारणांचा तपास सुरू
आसाम (IAF AN-32 Crash) : आसाममधील जोरहाट एअरबेसवर शनिवारी भारतीय वायुसेनेचे (IAF) ‘AN-32’ मालवाहू विमान लँडिंगनंतर भीषण अपघाताला सामोरे गेले. धावपट्टीवर सुरक्षित उतरल्यावर काही क्षणांतच विमानाला अचानक आग लागल्याने एअरबेस परिसरात मोठी खळबळ उडाली.
मिळालेल्या माहितीनुसार, विमानाने यशस्वी लँडिंग केल्यानंतर अवघ्या काही सेकंदांतच त्यातून प्रचंड आगीच्या ज्वाळा आणि धुराचे लोट उठू लागले. या अचानक घडलेल्या घटनेमुळे संपूर्ण एअरबेसवर गोंधळाचे वातावरण निर्माण झाले.
घटनेची माहिती मिळताच भारतीय वायुसेनेचे अग्निशामक दल तसेच आपत्कालीन बचाव पथक तातडीने घटनास्थळी दाखल झाले. विमानातील चालक दल आणि इतर कर्मचाऱ्यांना सुरक्षित बाहेर काढण्याचे प्रयत्न सुरू करण्यात आले असून आग विझवण्याचे कामही युद्धपातळीवर हाती घेण्यात आले आहे.
प्राथमिक अहवालानुसार, विमान धावपट्टीवर सुरक्षितपणे उतरले होते. मात्र त्यानंतर लगेचच आग लागून परिस्थिती गंभीर बनली. आग लागल्यानंतर काही क्षणांतच परिसरात धुराचे मोठे लोट दिसू लागले. या घटनेमुळे एअरबेसवरील सर्व यंत्रणा सतर्क झाल्या आणि बचावकार्य तातडीने सुरू करण्यात आले.
भारतीय हवाई दलाने या घटनेबाबत अधिकृत प्रसिद्धीपत्रक जारी केले आहे. त्यात म्हटले आहे की, आज जोरहाट येथे भारतीय हवाई दलाच्या एका AN-32 विमानाचा अपघात झाला आहे. पुढील तपशील अधिक माहिती मिळाल्यानंतर देण्यात येतील, असेही स्पष्ट करण्यात आले आहे.
दरम्यान, विमानात लागलेल्या आगीचे नेमके कारण आणि संभाव्य नुकसान याबाबत हवाई दलाकडून तपास सुरू करण्यात आला असून अद्याप अधिकृतपणे कोणतीही सविस्तर माहिती जाहीर करण्यात आलेली नाही.