अभिषेक शर्मा बनला IPL चा नवा 'सिक्सर किंग'

नवी दिल्ली (Abhishek Sharma Record) : आयपीएल 2026 च्या 31 व्या सामन्यात, सनरायझर्स हैदराबादचा (SRH) युवा सलामीवीर अभिषेक शर्माने दिल्ली कॅपिटल्सच्या गोलंदाजांना धुळ चारत इतिहास रचला. राजीव गांधी स्टेडियमवर 135 धावांची नाबाद खेळी करताना अभिषेकने (Abhishek Sharma) षटकारांचा एक असा विक्रम रचला, जो आजपर्यंत कोणत्याही भारतीय फलंदाजाने केलेला नाही.

अभिषेक शर्माने रचला इतिहास

अभिषेक शर्मा (Abhishek Sharma) आयपीएलच्या इतिहासात दोन वेगवेगळ्या सामन्यांमध्ये 10 किंवा त्याहून अधिक षटकार मारणारा दुसरा फलंदाज ठरला आहे. असे करणारा तो पहिला भारतीय आहे. त्याच्या आधी कोणत्याही भारतीयाने दोन आयपीएल सामन्यांमध्ये 10 षटकार मारले नव्हते. 'युनिव्हर्स बॉस' ख्रिस गेल चार वेळा ही कामगिरी करून या यादीत अव्वल स्थानी आहे. अभिषेकने आता दोन वेळा ही कामगिरी करून दुसरे स्थान पटकावले आहे.

अभिषेकने केली कोहलीची बरोबरी

अभिषेकने (Abhishek Sharma) दिल्लीविरुद्ध 68 चेंडूंमध्ये नाबाद 135 धावा केल्या. टी20 क्रिकेटच्या इतिहासात पाचव्यांदा अभिषेकने एका डावात 10  किंवा त्याहून अधिक षटकार मारले आहेत. त्याने एविन लुईस आणि श्रेयस अय्यर (चार वेळा) यांचा विक्रम मोडला आहे. हे अभिषेकच्या टी20 कारकिर्दीतील नववे शतक होते. यासह, त्याने टी20 क्रिकेटमध्ये सर्वाधिक शतके करणाऱ्या महान विराट कोहलीची बरोबरी केली.

दोनदा 50 पेक्षा कमी चेंडूंमध्ये शतक

अभिषेक शर्मा (Abhishek Sharma) आता आयपीएलमध्ये दोनदा 50 पेक्षा कमी चेंडूंमध्ये शतक पूर्ण करणारा पहिला भारतीय फलंदाज ठरला आहे. त्याने दिल्लीविरुद्ध अवघ्या 47 चेंडूंमध्ये आपले शतक पूर्ण केले. यापूर्वी त्याने 2025 मध्ये पंजाब किंग्सविरुद्ध 141 धावांची खेळी करताना हीच कामगिरी केली होती. अभिषेक शर्माच्या नाबाद शतकाच्या आधारावर सनरायझर्स हैदराबादने दिल्ली कॅपिटल्ससमोर 243 धावांचे लक्ष्य ठेवले.