पातूर : राज्यात अल्पवयीन मुलींवरील अत्याचाराच्या घटनांमध्ये वाढ होत असून, अशा गंभीर गुन्ह्यांना आळा घालण्यात राज्य शासन अपयशी ठरत असल्याची टीका राष्ट्रवादी काँग्रेस (पवार गट) चे नेते रोहित पवार यांनी केली.
पातूर तालुक्यातील सावरगाव येथे दहा वर्षीय अल्पवयीन मुलीवर ६० वर्षीय व्यक्तीने अत्याचार केल्याची धक्कादायक घटना उघडकीस आल्यानंतर रोहित पवार यांनी गावाला भेट देत पीडित कुटुंबाची भेट घेतली. या घटनेमुळे परिसरात संतापाचे वातावरण निर्माण झाले असून, दोषीला कठोर शिक्षा झाल्याशिवाय आमचा लढा थांबणार नाही, असा इशारा त्यांनी दिला.
या प्रकरणातील आरोपीने पीडित मुलीला धमकावून घटना दडपण्याचा प्रयत्न केल्याचेही समोर आले आहे. संबंधित आरोपीविरुद्ध पोलिसांत गुन्हा दाखल करण्यात आला असून त्याला अटक करण्यात आली आहे.
पीडित कुटुंबाला न्याय मिळवून देण्यासाठी आपण कटिबद्ध असून, या घटनेचे पडसाद विधानसभेतही उमटवले जातील, अशी ग्वाही रोहित पवार यांनी दिली.
यावेळी बाळापूर मतदारसंघाचे आमदार नितीन देशमुख, संग्राम गावंडे, डॉ. आशा मिरगे, हिदायत खान, रुमखान आदी उपस्थित होते.
