साळापुरी येथे मध्यरात्रीची घटना; चोरट्याविरुद्ध दैठणा पोलिसात गुन्हा दाखल....!
परभणी (Parbhani burglary case) : तालुक्यातील साळापुरी येथे साखरपुड्याच्या कार्यक्रमासाठी संपूर्ण कुटुंब बाहेर गेले. हीच संधी साधून चोरट्याने घरफोडी केली. रोख रक्कम व चांदीचा ऐवज असा एकूण ३ लाख १३ हजार ६०० रुपयांचा मुद्देमाल लंपास केला. या प्रकरणी दैठणा पोलीस ठाण्यात चोरट्याविरुद्ध गुन्हा दाखल करण्यात आला आहे.
पोलिस सुत्रांकडून मिळालेल्या माहितीनुसार, फिर्यादी मनिष रमाकांत घाटगे राहणार साळापुरी ता. जि.परभणी हे आपल्या कुटुंबासह परभणी येथील पाथरी रोडवरील अन्नपूर्णा मंगल कार्यालय येथे साखरपुड्याच्या कार्यक्रमासाठी गेले होते. याच संधीचा फायदा घेत अज्ञात चोरट्याने २४ एप्रिल रोजी रात्री ११ वाजेपासून ते २५ एप्रिल रोजी पहाटे ५ वाजेदरम्यान त्यांच्या घराच्या पाठीमागील दरवाजा तोडून आत प्रवेश केला. चोरट्यांनी कपाटाचे लॉक तोडून त्यामधील अंदाजे ३ लाख १० हजार रुपये रोख व १२०० ग्रॅम चांदीचे दोन प्लेट व एक चांदीचा तांब्या, किंमत अंदाजे ३ हजार ६०० रुपये असा एकूण ३ लाख १३ हजार ६०० रुपयांचा ऐवज चोरी करून आरोपी पसार झाला.
घटनेची माहिती मिळताच वरिष्ट पोलीस अधिकारी व दैठणा पोलीस ठाण्याचे सहाय्यक पोलीस निरीक्षक जायभाय यांनी कर्मचार्‍यांसह घटनास्थळी भेट देऊन पाहणी केली. या प्रकरणी दैठणा पोलिसात गु.र.नं. १७३/२०२६ अन्वये भादंवि कलम ३३१(४), ३०५ नुसार शनिवार २५ एप्रिल रोजी संध्याकाळी उशिरा (Parbhani burglary case) गुन्हा दाखल करण्यात आला आहे. दरम्यान, परिसरात अलीकडे घरफोडीच्या घटनांमध्ये वाढ होत असल्याने नागरिकांमध्ये भीतीचे वातावरण निर्माण झाले असून पोलिसांनी गस्त वाढवून आरोपींचा लवकरात लवकर शोध घ्यावा, अशी मागणी स्थानिकांकडून केली जात आहे.
