पाच आरोपींसह दोन अनोळखी महिलांविरुद्ध गुन्हा, तिघांना अटक
मंगरूळपीर (Mangrulpir-Sattur Attack) : मंगरूळपीर शहरातील बसस्टॉपसमोरील विराट पान सेंटर येथे किरकोळ कारणावरून झालेल्या वादाचे हिंसक रूपांतर होऊन सत्तूर व दगडाने करण्यात आलेल्या हल्ल्यात दोन भाऊ गंभीर जखमी झाल्याची घटना ९ जुलै रोजी घडली. या प्रकरणी मंगरूळपीर पोलिसांनी पाच नामनिर्देशित आरोपी व दोन अनोळखी महिलांविरुद्ध गंभीर स्वरूपाचे गुन्हे दाखल केले, असून तिघा आरोपींना दि.11 जुलै रोजी अटक करण्यात आली आहे.
पोलिसांनी दिलेल्या माहितीनुसार, फिर्यादी विशाल नागोराव सिनगारे (वय ३०, रा. वरुड बु., ता. मंगरूळपीर) हे आपला भाऊ अंकुश सिनगारे यांच्यासह विराट पान सेंटरवर उभे असताना आरोपींनी अंकुश यांना खाली पाडून मारहाण करण्यास सुरुवात केली. त्यावेळी विशाल यांनी जाब विचारताच आरोपींनी शिवीगाळ करत लाथाबुक्क्यांनी व दगडाने मारहाण केली. त्यानंतर एका आरोपीने हातातील सत्तूरने विशाल व अंकुश या दोघांवर सपासप वार केल्याने ते गंभीर जखमी झाले.
जखमींना प्रथम ग्रामीण रुग्णालय मंगरूळपीर (Mangrulpir-Sattur Attack) येथे उपचारासाठी दाखल करण्यात आले. प्रकृती गंभीर असल्याने त्यांना पुढील उपचारासाठी जिल्हा सामान्य रुग्णालय, वाशिम येथे हलविण्यात आले. उपचारादरम्यान नातेवाईक अजय काळू सिनगारे यांनी घटनास्थळाचा व्हिडिओ दाखविल्यानंतर आरोपींची ओळख पटली. त्यानुसार उमेश रमेश इंगोले, मंगेश रमेश इंगोले, दिनेश उर्फ डेब्या रमेश इंगोले, रमेश इंगोले तसेच दोन अनोळखी महिलांविरुद्ध गुन्हा दाखल करण्यात आला.
या प्रकरणी गुन्हा क्र. ४९९/२०२६ अन्वये भारतीय न्याय संहिता (BNS) कलम ११८(२), १८९(२), १९१(२), १९१(३), १९०, ११५(२), ३५२ अंतर्गत गुन्हा नोंदविण्यात आला आहे. पोलिसांनी तिघा आरोपींना अटक केली असून पुढील तपास पोलीस उपनिरीक्षक सोळंके करीत आहे.
