क्रांती चौक परिसरातील घटना; अज्ञात चोरट्याविरुध्द गुन्हा
मानवत (Manwat Burglary Crime) : शहरातील क्रांती चौक परिसरात घरफोडी करत अज्ञात चोरट्यांनी कपाटातील सुमारे २ लाख ९२ हजार रुपये किंमतीचे सोन्याचे दागिने लंपास केल्याची घटना मंगळवार १० मार्च रोजी उघडकीस आली. या प्रकरणी मानवत पोलीस ठाण्यात अज्ञात चोरट्यावर गुन्हा दाखल करण्यात आला आहे.
घटने बाबत अधिक माहिती अशी की, वासुदेव बाकळे व त्यांची पत्नी मेघा हे दोघेही मुलगा प्रतीक याला भेटण्यासाठी पुणे येथे गेले होते. होळी व रंगपंचमी सणानिमित्त ते काही दिवस पुण्यातच थांबले दरम्यान, शेजारी राहणार्‍या महिलांनी फोन करून त्यांच्या घराचा दरवाजा उघडा दिसत असल्याची माहिती त्यांना दिली. त्यानंतर बाकळे यांनी आपल्या पुतण्याला घर पाहण्या साठी पाठविले असता घराच्या मुख्य दरवाज्याचे कुलूप तोडलेले असल्याचे तसेच (Manwat Burglary Crime) घरातील कपाटाचे लॉक तोडून सामान अस्ताव्यस्त टाकलेले असल्याचे आढळून आले.
ही माहिती मिळताच बाकळे कुटुंबीय तातडीने मानवत येथे परतले. घरात पाहणी केली असता कपाटातील सुमारे १५ तोळे सोन्याचे दागिने चोरीला गेल्याचे निदर्शनास आले.या दागिण्यांची किंमत सुमारे २ लाख ९२ हजार रुपये आहे. या प्रकरणी वासुदेव दत्तात्र्य बाकळे यांच्या फिर्यादीवरून मानवत पोलीस ठाण्यात अज्ञात चोरट्याविरुद्ध गुन्हा दाखल करण्यात आला आहे.
