काद्राबाद प्लॉट परिसरात कारवाई; नानलपेठ पोलिस ठाण्यात गुन्हा दाखल
परभणी (Parbhani Illegal weapon) : शहरातील वाढत्या गुन्हेगारीवर आळा घालण्यासाठी जिल्हा पोलिस अधीक्षक रवींद्र सिंह परदेशी यांच्या मार्गदर्शनाखाली नानलपेठ पोलिसांनी अवैध शस्त्र बाळगणार्‍या एका युवकास ताब्यात घेत कारवाई केली आहे. शनिवार २५ एप्रिल च्या पहाटे सुमारे १.३० वाजण्याच्या सुमारास ही कारवाई करण्यात आली.
घटने बाबत अधिक माहिती अशी की, इमाम अहमद रजा चौक परिसरातील काद्राबाद प्लॉट येथे फहीम किराणा दुकानासमोर एक युवक संशयास्पद हालचाली करत फिरत असल्याची माहिती पोलिसांना मिळाली होती. सदर माहितीच्या आधारे पोलिस नाईक नारायण जिजाराव पोले यांनी तात्काळ घटनास्थळी धाव घेत संशयिताला ताब्यात घेतले. झडती दरम्यान संबंधित युवकाकडे धारदार चाकू आढळून आला. सार्वजनिक ठिकाणी अशा प्रकारे अवैध शस्त्र बाळगणे हा गंभीर गुन्हा मानला जात असल्याने (Parbhani Illegal weapon) पोलिसांनी तात्काळ कारवाई करत आरोपीस अटक केली. या प्रकरणी शेख अल्तमशुद्दीन शेख नियाझुद्दीन रा.सुभेदार नगर, याच्याविरुद्ध भारतीय शस्त्र अधिनियम कलम ४/२५ तसेच महाराष्ट्र पोलीस अधिनियम कलम १३५ अन्वये नानलपेठ पोलीस ठाण्यात पोलिस नाईक नारायण जिजाराव पोले यांच्या फिर्यादीवरून शेख अल्तमशुद्दीन शेख नियाझुद्दीन याच्या विरुद्ध गुन्हा दाखल करण्यात आला असून पुढील तपास पोलीस करत आहे.
दरम्यान, शहरात कायदा व सुव्यवस्था अबाधित राखण्यासाठी अशा प्रकारच्या अवैध कृत्यांविरुद्ध कठोर कारवाई सुरूच राहणार असल्याचे पोलिस प्रशासनाने स्पष्ट केले आहे. नागरिकांनीही कोणतीही संशयास्पद हालचाल आढळल्यास तात्काळ पोलिसांना कळवावे, असे आवाहन करण्यात आले आहे. या घटनेचा पुढील तपास नानलपेठ पोलीस ठाण्याचे पोलिस करीत आहेत.
