लघुलेखक पदभरतीसाठी भाजयुमोचे खा. अशोकराव चव्हाण यांना निवेदन

संबंधित विद्यार्थ्यांसाठी मार्ग काढून समांतर पद निर्माण करण्याची शशिकांत पा क्षीरसागर यांची मागणी

​मुंबई (Stenographer Recruitment) : मंत्रालयीन व महाराष्ट्रातील विविध शासकीय विभागांमधील लघुलेखक (स्टेनोग्राफर) संवर्गातील रिक्त पदे 'मृत' घोषित न करता त्यांची नियमित पदभरती करावी किंवा त्या विद्यार्थ्यांसाठी समांतर असे पद कॉम्प्युटर ऑपरेटर (Stenographer Recruitment) असे पद काढून या विद्यार्थ्यांना न्याय देण्यात यावा या मागणीसाठी भारतीय जनता युवा मोर्चाने मंगळवारी माजी मुख्यमंत्री खा. अशोकराव चव्हाण यांची भेट घेऊन त्यांना सविस्तर निवेदन देण्यात आले. यावेळी विद्यार्थ्यांच्या अडचणी सोडवून आपण यात मार्ग काढून शासना कडे पाठपुरावा करावा अशी मागणी भाजयुमोचे जिल्हाध्यक्ष शशिकांत पा क्षीरसागर यांनी खा.अशोकराव चव्हाण यांच्याकडे केली आहे.

 या निवेदनात प्रामुख्याने नमूद करण्यात आले आहे की, एप्रिल २०२२ नंतर कोणतीही नवीन भरती जाहिरात न आल्याने आणि शासनाने अचानक १२६ संवर्ग रद्द करण्याचा निर्णय घेतल्याने हजारो विद्यार्थ्यांचे भवितव्य टांगणीला लागले आहे. ३ ते ४ वर्षे कठोर परिश्रम करून स्टेनोग्राफीचे कौशल्य आत्मसात करणारे ग्रामीण व आर्थिकदृष्ट्या दुर्बल घटकातील विद्यार्थी आता वयोमर्यादेच्या उंबरठ्यावर पोहोचले आहेत.

पदभरतीतील (Stenographer Recruitment) या विलंबामुळे विद्यार्थ्यांमध्ये मानसिक ताण आणि नैराश्य वाढत असून, कुशल मनुष्यबळ इतर क्षेत्रांकडे वळण्याची भीती निर्माण झाली आहे.​या पार्श्वभूमीवर, एप्रिल २०२२ पासून प्रलंबित असलेली भरती तात्काळ जाहीर करावी, रद्द केलेले १२६ संवर्ग पुन्हा सुरू करावेत आणि 'जीसीसी' उत्तीर्ण विद्यार्थ्यांसाठी कायमस्वरूपी व पारदर्शक रोजगार धोरण आखून त्याचे निश्चित वेळापत्रक जाहीर करावे, अशा मागण्या या निवेदन माजी मुख्यमंत्री खा. अशोकराव चव्हाण यांच्याकडे करण्यात आल्या आहेत.

या गंभीर बाबीची दखल घेऊन विद्यार्थ्यांच्या न्याय्य हक्कासाठी सकारात्मक निर्णय घ्यावा, अशी विनंती भाजयुमोचे जिल्हाध्यक्ष शशिकांत पा क्षीरसागर यांनी केली.यावेळी करण चव्हाण, प्रियेश ठाकूर, शिवा लोट, अक्षय पवार, मारोती जाधव, युवराज शिंदे, प्रथम चौधरी यांसह मोठया प्रमाणात विध्यार्थी उपस्थित होते.