इस्रायलमध्ये ३५०० होम बेस्ड केअरगिव्हर पदांसाठी भरती प्रक्रिया सुरू

महाराष्ट्र इंटरनॅशनल पोर्टलवर नोंदणीचे आवाहन

हिंगोली (Caregiver Recruitment) : नॅशनल स्किल डेव्हलपमेंट कॉर्पोरेशन आणि महाराष्ट्र शासनाच्या माध्यमातून इस्रायलमध्ये होम बेस्ड केअरगिव्हर पदांसाठी ३५०० उमेदवारांची भरती प्रक्रिया सुरू करण्यात आली आहे. आरोग्य व सेवा क्षेत्रात करिअर करू इच्छिणाऱ्या राज्यातील तरुणांसाठी ही एक सुवर्णसंधी असून इच्छुकांनी महाराष्ट्र इंटरनॅशनल https://maharashtrainternational.com⁠ या अधिकृत संकेतस्थळावर नोंदणी करावी, असे आवाहन करण्यात आले आहे.

या (Caregiver Recruitment) भरती प्रक्रियेत ९० टक्के महिला व १० टक्के पुरुष उमेदवारांची निवड केली जाणार आहे. अर्जदाराचे वय २५ ते ४५ वर्षे दरम्यान असावे तसेच किमान १० वी उत्तीर्ण असणे आवश्यक आहे. शारीरिक पात्रतेनुसार उमेदवाराची उंची किमान १.५ मीटर व वजन किमान ४५ किलो असणे गरजेचे आहे. यासोबतच इंग्रजी भाषेचे मध्यम स्तरावरील ज्ञान आवश्यक आहे. शैक्षणिक पात्रतेनुसार उमेदवाराने केअरगिव्हिंग सेवांमध्ये किमान ९९० तासांचे प्रशिक्षण पूर्ण केलेले असावे किंवा नर्सिंग, फिजिओथेरपी, नर्स असिस्टंट अथवा मिडवायफरी यापैकी मान्यताप्राप्त डिप्लोमा किंवा पदवी असणे आवश्यक आहे.

निवड झालेल्या उमेदवारांना प्रति महिना ६४४३.८५ इस्रायली न्यू शेकेल म्हणजे अंदाजे रुपये १.९९ लाख इतके वेतन मिळणार आहे. याशिवाय नियोक्त्याकडून राहण्याची सोय, भोजन व वैद्यकीय विमा सुविधा उपलब्ध करून दिली जाणार आहे. इच्छुक उमेदवारांनी महाराष्ट्र इंटरनॅशनल पोर्टलवर नोंदणी करून आवश्यक कागदपत्रे सादर करावीत. पात्र उमेदवारांची निवड ऑनलाइन प्रक्रिया व व्हिडिओ मुलाखतीद्वारे केली जाणार आहे.

उमेदवाराने यापूर्वी इस्रायलमध्ये काम केलेले नसावे. तसेच उमेदवाराचे जवळचे नातेवाईक (पती/पत्नी, पालक किंवा मुले) सध्या इस्रायलमध्ये कार्यरत नसावेत. निवड प्रक्रियेसाठी पोलीस पडताळणी प्रमाणपत्र व वैद्यकीय तपासणी अनिवार्य राहील. (Caregiver Recruitment) अधिक माहितीसाठी व अर्जासाठी इच्छुकांनी संबंधित अधिकृत संकेतस्थळाला भेट द्यावी किंवा जिल्हा कौशल्य विकास, रोजगार व उद्योजकता मार्गदर्शन केंद्र, मध्यवर्ती प्रशासकीय इमारत, एस-३, दुसरा मजला, हिंगोली येथे संपर्क साधावा, असे आवाहन सहाय्यक आयुक्त बालाजी मरे यांनी केले आहे.