पंढरपूर येथील चंद्रभागा वाळवंटात शासकीय व परंपरेनुसार अंत्यसंस्कार
पंढरपूर (Warkari Sampraday) : संत तुकाराम महाराजांचे वंशज आणि वारकरी संप्रदायातील ज्येष्ठ कीर्तनकार ह.भ.प. विठ्ठल उर्फ श्री महाराज देहूकर (वय ६३) यांचे पंढरपूर येथे अल्प आजाराने निधन झाले. त्यांच्या निधनाने वारकरी संप्रदायात हळहळ व्यक्त केली जात आहे.
वारकरी संप्रदायात मोलाचे योगदान देणाऱ्या श्री महाराज देहूकर यांच्यावर गुरुवारी (२१ मे) सकाळी ७ वाजता पंढरपूर येथील चंद्रभागा नदीच्या वाळवंटात शासकीय व परंपरेनुसार अंत्यसंस्कार करण्यात आले.
त्यांनी मागील ३० हून अधिक वर्षे प्रवचन व कीर्तनाच्या माध्यमातून वारकरी संप्रदायाचा प्रसार केला. त्यांच्या प्रभावी कीर्तनशैलीमुळे ते राज्यभरात परिचित होते. महाविद्यालयीन जीवनात ते मल्लखांबचे दिग्गज खेळाडू होते. अखिल भारतीय विद्यापीठीय स्पर्धेत त्यांनी दुसरा क्रमांक पटकावला होता, अशी माहिती समोर आली आहे. ते पंढरपूर अर्बन बँकेचे माजी चेअरमन आणि प्राध्यापक बाळासाहेब देहूकर यांचे धाकटे बंधू होते.
त्यांच्या पश्चात पत्नी, एक मुलगा आणि एक मुलगी असा परिवार आहे. त्यांच्या निधनामुळे वारकरी संप्रदायात मोठी पोकळी निर्माण झाल्याची भावना व्यक्त केली जात आहे.
