वारंगा फाटा (Unnatural Death Case) : कळमनुरी तालुक्यातील भाटेगाव–झुनझुनवाडी शिवारात बुधवारी सकाळी एका ३८ वर्षीय युवकाचा मृतदेह लिंबाच्या झाडाखाली आढळून आल्याने परिसरात खळबळ उडाली आहे.
२३ एप्रिल रोजी सकाळच्या सुमारास शेतात कामासाठी गेलेल्या एका शेतकऱ्याच्या निदर्शनास हा प्रकार आला. झाडाखाली एक व्यक्ती निष्प्राण अवस्थेत पडलेली दिसताच त्यांनी तात्काळ वारंगा फाटा पोलीस दूरक्षेत्राला माहिती दिली. पोलिसांनी घटनास्थळी धाव घेत पंचनामा केला.
मृताची ओळख साहेबराव गौतम घनघाव (वय ३८, रा. भाटेगाव) अशी पटली आहे. प्राथमिक माहितीनुसार त्यांचा मृत्यू २३ एप्रिल रोजीच झाला असावा, असा अंदाज व्यक्त केला जात आहे. मात्र, मृत्यूचे नेमके कारण शवविच्छेदन अहवालानंतरच स्पष्ट होणार आहे.
साहेबराव घनघाव हे परिसरात ऑटोचालक म्हणून काम करत होते. मनमिळाऊ स्वभावामुळे वारंगा फाटा, कळमनुरी आणि आसपासच्या गावांमध्ये ते परिचित होते. त्यांच्या अचानक निधनामुळे भाटेगाव व झुनझुनवाडी परिसरात शोककळा पसरली असून हळहळ व्यक्त केली जात आहे.
त्यांच्या पश्चात पत्नी, एक मुलगा, आई-वडील आणि भाऊ असा परिवार आहे. कुटुंबातील कर्ता पुरुष गमावल्याने त्यांच्या कुटुंबावर मोठे संकट कोसळले आहे.
या प्रकरणाचा पुढील तपास पोलीस निरीक्षक विष्णुकांत गुट्टे यांच्या मार्गदर्शनाखाली बीट जमादार संतोष नागरगोजे आणि विठ्ठल जाधव करत आहेत. दरम्यान, मृतदेहाचे डोंगरकडा येथील प्राथमिक आरोग्य केंद्रात शवविच्छेदन करून नातेवाईकांच्या ताब्यात देण्यात आले आहे.
