तिहेरी हत्याकांडामुळे नांदेड शहरात खळबळ
नांदेड (Triple Murder) : शहरातील डी-मार्ट रस्त्यावर शुक्रवारी उशिरा रात्री दोन गँग आमनेसामने आल्याने झालेल्या रक्तरंजित हल्ल्यात तिघांचा मृत्यू झाला. यामध्ये दोघांचा घटनास्थळीच मृत्यू झाला, तर जखमी अवस्थेत रुग्णालयात नेलेल्या आणखी एका व्यक्तीची तेथेच हत्या करण्यात आली. या तिहेरी हत्याकांडामुळे नांदेड शहरात प्रचंड खळबळ उडाली आहे.
रुग्णालयात नेल्यानंतरही एकाचा खून; दोन गँगमधील जुना वाद चिघळला
सदा गँग आणि साई लाला गँग यांच्यात मागील अनेक वर्षांपासून वाद सुरू आहे. काही दिवसांपूर्वी अर्जितसिंघ उर्फ अजयसिंघ आणि शहाबाज यांच्यात झालेल्या वादातून ही घटना घडल्याची माहिती समोर येत आहे. शुक्रवारी रात्री अर्जित आणि त्याचे मित्र चित्रपट पाहून परतत असताना, शहाबाज व त्याच्या साथीदारांनी त्यांच्यावर पाळत ठेवून त्यांना गाठले.
यानंतर दोन्ही गटांमध्ये जोरदार हाणामारी झाली. तलवारी व खंजीरांनी एकमेकांवर हल्ला करण्यात आला. या हल्ल्यात अर्जितसिंघ आणि शहाबाज यांचा जागीच मृत्यू झाला. जखमींना तत्काळ विष्णुपुरी येथील शासकीय रुग्णालयात दाखल करण्यात आले. मात्र, तेथे अर्जितच्या भावाने हल्ला चढवत अरबाज याची हत्या केली.
घटनास्थळावरून पोलिसांनी तीन दुचाकी, खंजीर व इतर साहित्य जप्त केले आहे. घटनेची माहिती मिळताच पोलिस उपमहानिरीक्षक शहाजी उमाप, पोलिस अधीक्षक अबिनाश कुमार, भाग्यनगर पोलीस ठाण्याचे निरीक्षक संतोष तांबे तसेच इतर वरिष्ठ अधिकारी घटनास्थळी दाखल झाले. स्थानिक गुन्हे शाखा, फॉरेन्सिक टीम आणि श्वान पथकानेही तपास सुरू केला आहे.
या घटनेमुळे शहरात भीतीचे वातावरण निर्माण झाले असून पोलिसांकडून पुढील तपास सुरू आहे.
