परभणीत अति दारू सेवनामुळे ५४ वर्षीय इसमाचा मृत्यू

^{एमआयडीसी परिसरात आढळला मृतदेह गंगाखेड पोलीसात अकस्मात मृत्यूची नोंद}

परभणी/ गंगाखेड (Alcohol Consumption Death) : अति दारू सेवन केल्यामुळे ५४ वर्षीय इसमाचा मृत्यु झाल्याची घटना शुक्रवार २४ जुलै रोजी दुपारी ४ वाजता गंगाखेड शहरातील एमआयडीसी परिसरात उघडकीस आली.

गंगाखेड शहरातील एमआयडीसी परिसरात मरगळवाडी रस्त्याच्या बाजूच्या जागेत एक अनोळखी इसम बेशुद्धवस्थेत पडलेला असल्याची माहिती मिळाल्याने शुक्रवार २४ जुलै रोजी दुपारी ४ वाजेच्या सुमारास गंगाखेड पोलीस ठाण्यातील पोलीस उपनिरीक्षक विशाल सूर्यवंशी, महिला पोलीस नाजमीन पठाण, पो.शि. शिवाजी बोमशेटे आदींनी घटनास्थळी जाऊन अनोळखी इसमास दिपक सपकाळ यांच्या खाजगी रुग्णवाहिकेतून गंगाखेड उपजिल्हा रुग्णालयात दाखल केले असता डॉक्टरांनी तपासून त्यास मयत घोषित केले.

या (Alcohol Consumption Death) अनोळखी इसमाच्या नातेवाईकांचा शोध घेत असतांना मयत इसम हा शहरातील दस्तगीर मोहल्ला येथील रहिवासी राम ज्ञानोबा मुंढे वय ५४ वर्ष हे असल्याचे त्यांचा भाऊ शाम मुंढे यांना समजले व ते दारु पिण्याचे सवयीचे होते तसेच गुरुवार २३ जुलै रोजी सकाळी १० वाजेच्या सुमारास राम मुंढे हे घरुन बाहेर गेले व रात्री उशिरापर्यंत ते घरी परत आले नाही. त्यांचा शहरात शोध घेतांना पोलीसांद्वारे  मिळालेल्या माहितीवरून भाऊ राम ज्ञानोबा मुंढे हे मयत झाल्याचे समजल्याने शाम ज्ञानोबा मुंढे वय ४८ वर्ष यांनी दिलेल्या खबरीवरून गंगाखेड पोलीस ठाण्यात अकस्मात मृत्युची नोंद करण्यात आली याचा पुढील तपास सपोउपनि शंकर रेंगे पाटील, पो.शि. प्रदिप रनशूर हे करीत आहे.