‘कार्यकर्त्यांच्या भावनांशी खेळ करणाऱ्यां विरोधात संताप’
सेनगाव (MP Nagesh Patil Ashtikar) : शिवसेनेतील राजकीय घडामोडींना आणि ‘ऑपरेशन टायगर’च्या पार्श्वभूमीवर वाढलेल्या असंतोषाला सेनगाव शहरात सोमवारी ता १७ रोजी तीव्र स्वरूप प्राप्त झाले. ऊबाटा गटाचे खासदार नागेश आष्टिकर (MP Nagesh Patil Ashtikar) यांच्या भूमिकेविरोधात संतप्त शिवसैनिकांनी तहसील कार्यालय परिसरात त्यांच्या प्रतिकात्मक पुतळ्याचे दहन करत निषेध नोंदविला. यावेळी शिवसेना जिल्हाप्रमुख संदेश देशमुख, युवासेना तालुका प्रमुख जगदीश गाढवे, करण देशमुख यांच्यासह मोठ्या संख्येने शिवसैनिक उपस्थित होते. कार्यकर्त्यांनी घोषणाबाजी करत पक्षनिष्ठा आणि कार्यकर्त्यांच्या भावनांचा सन्मान राखण्याची मागणी केली.
यावेळी उपस्थित पदाधिकाऱ्यांनी प्रतिक्रिया देताना सांगितले की, “ज्या नेत्याला निवडून आणण्यासाठी कार्यकर्त्यांनी दिवस-रात्र मेहनत घेतली, जिवाचे रान केले, त्याच नेत्याने पक्षाशी आणि कार्यकर्त्यांच्या भावनांशी प्रतारणा केल्याची भावना शिवसैनिकांमध्ये निर्माण झाली आहे. त्यामुळे हा संताप व्यक्त करण्यात आला.”
तहसील कार्यालय परिसरात झालेल्या या आंदोलनादरम्यान काही काळ वातावरण तापले होते. मात्र आंदोलन शांततेत पार पडले. आंदोलनकर्त्यांनी संबंधित नेत्याच्या भूमिकेचा निषेध करत आगामी काळातही पक्षनिष्ठेला धक्का पोहोचविणाऱ्या निर्णयांविरोधात आवाज उठविण्याचा इशारा दिला. या आंदोलनामुळे सेनगावातील राजकीय वातावरण पुन्हा एकदा चर्चेत आले असून स्थानिक पातळीवर विविध प्रतिक्रिया उमटत आहेत.
