परभणी (Robbery Case) : शहरातील कृषी सारथी कॉलनी परिसरात मॉर्निंग वॉकला गेलेल्या वृद्ध दांपत्यास दुचाकीवरून आलेल्या तीन इसमांनी चाकूचा धाक दाखवून तब्बल २ लाख ७८ हजार रुपये किमतीचे दागिने लंपास केल्याची घटना शुक्रवार, २४ एप्रिल रोजी सकाळी ५.२० वाजण्याच्या सुमारास घडली. या प्रकरणी नवा मोंढा पोलीस ठाण्यात तीन अज्ञात चोरट्यांविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, अनुराधा शिंदे या त्यांच्या पतीसोबत मॉर्निंग वॉकसाठी कृषी सारथी कॉलनी परिसरातील हनुमान मंदिरासमोरील रस्त्यावरून जात होत्या. त्यावेळी समोरून दुचाकीवर आलेल्या तीन अज्ञात चोरट्यांनी त्यांना अडवले. आरोपींनी चाकूचा धाक दाखवून जिवे मारण्याची धमकी दिली.
त्यानंतर आरोपींनी जबरदस्तीने कटरच्या साहाय्याने त्यांच्या अंगावरील सोन्याचे दागिने कापून काढले. यामध्ये अंदाजे आठ तोळे सोन्याचे दागिने असून त्यात सुमारे दोन तोळ्यांचे सोन्याचे गंठन (चेन) आणि सहा तोळ्यांच्या सोन्याच्या बांगड्या यांचा समावेश आहे. एकूण २ लाख ७८ हजार रुपयांचा ऐवज लंपास करण्यात आला.
घटनेनंतर आरोपी संत गाडगेबाबा नगरकडे जाणाऱ्या रस्त्याने पसार झाले. या प्रकरणी अनुराधा शिंदे यांच्या फिर्यादीवरून नवा मोंढा पोलीस ठाण्यात तीन अज्ञात चोरट्यांविरुद्ध गुन्हा दाखल करण्यात आला असून पुढील तपास सपोनि कदम करीत आहेत.
पोलीस गस्त वाढविण्याची मागणी
शहरात पहाटेच्या वेळी घडलेल्या या धाडसी लुटीच्या घटनेमुळे नागरिकांमध्ये भीतीचे वातावरण निर्माण झाले आहे. मॉर्निंग वॉकला जाणाऱ्या महिला व ज्येष्ठ नागरिकांमध्ये विशेष दहशत पसरली असून पहाटेच्या वेळेत पोलीस गस्त वाढवावी, संशयितांवर लक्ष ठेवावे आणि शहरातील प्रमुख रस्ते व कॉलनी परिसरात नियमित गस्त घालावी, अशी मागणी नागरिकांकडून करण्यात येत आहे.
