हिंगोली- रिसोड राज्य महामार्गावरील वाहतूक काही काळ ठप्प, सरकार विरोधात घोषणाबाजी
सेनगाव (Road Block Protest) : मराठा आरक्षणाच्या मागणीसाठी अंतरवाली सराटी येथे उपोषणास बसलेल्या मराठा आंदोलनाचे नेते मनोज जरांगे पाटील यांना पाठिंबा दर्शविण्यासाठी सेनगाव शहरात शनिवारी ३० मे रोजी मराठा समाजाच्या वतीने रास्ता रोको आंदोलन करण्यात आले. या आंदोलनामुळे हिंगोली-रिसोड राज्य महामार्गावरील वाहतूक काही काळ ठप्प झाली होती.
मराठा आरक्षणाच्या मागणीसंदर्भात राज्य शासनाने दिलेल्या आश्वासनांची अद्याप पूर्ण अंमलबजावणी झालेली नसल्याचा आरोप करत मनोज जरांगे पाटील यांनी पुन्हा उपोषण सुरू केले आहे. त्यांच्या उपोषणाला राज्यभरातून पाठिंबा व्यक्त केला जात असून सेनगावातही मराठा समाजाच्या वतीने छत्रपती शिवाजी महाराज चौकातील टी-पॉइंट येथे आंदोलन करण्यात आले.
यावेळी आंदोलन कर्त्यांनी राज्य सरकारविरोधात जोरदार घोषणाबाजी करत निषेध नोंदविला. तसेच मराठा समाजाच्या मागण्यांवर शासनाने तातडीने सकारात्मक निर्णय घ्यावा, अन्यथा राज्यभर आंदोलन अधिक तीव्र करण्यात येईल, असा इशाराही देण्यात आला. आंदोलनात शिवसेना (उबाठा) पक्षाचे जिल्हाप्रमुख संदेश देशमुख, मराठा समाजाचे नेते गंगाधर सरकटे, संकेत पठाडे, पांडुरंग देशमुख, जगू गाढवे, करण देशमुख, अभिजित तिडके, ज्ञानेश्वर गाढवे, अमर देशमुख, अंकुश देशमुख, पंढरी गव्हाणे यांच्यासह कार्यकर्ते सहभागी झाले होते. दरम्यान, कायदा व सुव्यवस्था अबाधित राहावी यासाठी सेनगाव पोलिसांनी आंदोलनस्थळी कडेकोट बंदोबस्त तैनात केला होता. आंदोलन शांततेत पार पडले.
