हिंगोली (Pilgrim Security) : हिंगोली तालुक्यातील डिग्रस कर्‍हाळे येथून शेगावकडे जाणारी दिंडी ३ जुलै रोजी पुढील मार्गासाठी मार्गस्थ झाली. आषाढी वारीच्या पार्श्वभूमीवर निघालेल्या या दिंडीच्या सुरक्षेची जबाबदारी हिंगोली ग्रामीण पोलीस ठाण्याचे पोलीस निरीक्षक विष्णुकांत गुठ्ठे यांनी स्वतः खांद्यावर घेतली.
पावसाळी वातावरणात शेकडो वारकऱ्यांचा ताफा रस्त्याने मार्गक्रमण करत असताना पोलीस निरीक्षक विष्णुकांत गुठ्ठे यांनी दिंडीसोबत चालत चोख बंदोबस्त ठेवला. केवळ बंदोबस्तावरच न थांबता त्यांनी वारकऱ्यांसमवेत चालत वाहतूक व्यवस्थेवरही बारकाईने लक्ष ठेवले. रस्त्यावरून जाणाऱ्या वाहनांना शिस्त लावत दिंडीचा मार्ग मोकळा करण्याचे काम त्यांनी स्वतः केले.
पांढऱ्या वस्त्रातील वारकरी आणि हातात भगवे ध्वज घेऊन चालणाऱ्या दिंडीसोबत खाकी वर्दीतील पोलीस निरीक्षक विष्णुकांत गुठ्ठे चालत असल्याचे दृश्य उपस्थितांचे लक्ष वेधून घेत होते. कायदा व सुव्यवस्था राखतानाच वारकऱ्यांच्या सेवेतही पोलीस सहभागी झाल्याने दिंडीतील भाविकांनी समाधान व्यक्त केले.
डिग्रस कर्‍हाळे येथून निघालेली ही शेगावची दिंडी पुढील मुक्कामासाठी रवाना झाली असून, संपूर्ण मार्गावर पोलीस प्रशासनाकडून कडेकोट सुरक्षा व्यवस्था ठेवण्यात आली आहे.
