वर्धा (Nagpur Madgaon Express) : विदर्भ, कोकण आणि गोवा या भागांदरम्यान प्रवास करणाऱ्या प्रवाशांसाठी महत्त्वाचा दिलासादायक निर्णय घेण्यात आला असून, रेल्वे मंत्रालयाने नागपूर–मडगाव विशेष गाडीचे नियमितीकरण केले आहे. आतापर्यंत मागणीनुसार धावणारी 01139/01140 TOD विशेष गाडी आता 11203/11204 या नव्या क्रमांकासह ‘नागपूर–मडगाव एक्सप्रेस’ म्हणून नियमित सेवा देणार आहे. या निर्णयामुळे प्रवाशांना अधिक नियोजित, विश्वासार्ह आणि सातत्यपूर्ण रेल्वे सेवा उपलब्ध होणार आहे.
नियमित करण्यात आलेली ही द्वि-साप्ताहिक एक्सप्रेस पुढील वेळापत्रकानुसार धावणार आहे—
11203 नागपूर–मडगाव एक्सप्रेस : ही गाडी नागपूरहून बुधवार आणि शनिवार रोजी दुपारी 3.05 वाजता सुटेल व मडगाव येथे गुरुवार आणि रविवार सायंकाळी 5.45 वाजता पोहोचेल.
11204 मडगाव–नागपूर एक्सप्रेस : ही गाडी मडगावहून गुरुवार आणि रविवार रोजी रात्री 8.00 वाजता सुटेल व नागपूर येथे शुक्रवार आणि सोमवार रात्री 9.30 वाजता पोहोचेल.
ही एक्सप्रेस वर्धा, पुलगाव, धामणगाव, बडनेरा, अकोला, शेगाव, मलकापूर, भुसावळ, नाशिक रोड, इगतपुरी, कल्याण, पनवेल, रोहा, माणगाव, खेड, चिपळूण, संगमेश्वर रोड, रत्नागिरी, राजापूर रोड, कणकवली, कुडाळ, सावंतवाडी रोड, थिवीम आणि करमळी या प्रमुख स्थानकांवर थांबा घेणार आहे.
या नियमित सेवेमुळे विदर्भातून कोकण आणि गोवा भागात प्रवास करणाऱ्या प्रवाशांना थेट आणि अधिक सोयीस्कर पर्याय उपलब्ध होणार असून, दोन्ही भागांतील संपर्काला नवे बळ मिळणार आहे.
