बुलढाण्यातील सर्व १३ तालुके दुष्काळग्रस्त यादीत; ‘ट्रिगर-१’ लागू. आमदार चैनसुख संचेतींच्या पाठपुराव्याला यश.
मुख्यमंत्री देवेंद्र फडणवीसांकडे सातत्याने मागणी; बुलढाण्यातील सर्व १३ तालुके दुष्काळग्रस्त यादीत
मलकापूर : पावसाने तब्बल अनेक दिवस दांडी मारल्याने मलकापूर तालुक्यासह बुलढाणा जिल्ह्यातील शेतकऱ्यांच्या डोळ्यांसमोर उभी पिके होरपळत होती. सोयाबीन, कापूस, मका, तूर यांसह खरीप पिकांना पाण्याअभावी मोठा फटका बसल्याने बळीराजा आर्थिक संकटात सापडला होता. या गंभीर परिस्थितीची दखल घेत मलकापूर मतदारसंघाचे आमदार चैनसुख संचेती यांनी मुख्यमंत्री देवेंद्र फडणवीस यांच्याकडे बुलढाणा जिल्हा दुष्काळग्रस्त जाहीर करण्याची सातत्याने मागणी केली होती. अखेर त्यांच्या पाठपुराव्याला यश आले असून, बुलढाणा जिल्ह्यातील सर्व १३ तालुक्यांचा दुष्काळग्रस्त यादीत समावेश करण्यात आला आहे.
राज्य शासनाने २५ सप्टेंबर २०२६ रोजीच्या निर्णयानुसार राज्यातील ३५८ पैकी २६५ तालुक्यांमध्ये ‘ट्रिगर-१’ लागू केला आहे. त्यामध्ये बुलढाणा जिल्ह्यातील जळगाव जामोद, संग्रामपूर, चिखली, देऊळगाव राजा, मेहकर, बुलढाणा, सिंदखेडराजा, लोणार, खामगाव, शेगाव, मलकापूर, मोताळा आणि नांदुरा या सर्व १३ तालुक्यांचा समावेश आहे.
मलकापूर तालुक्यातील शेतशिवाराची प्रत्यक्ष पाहणी करताना पिकांची झालेली अवस्था, पावसाचा प्रदीर्घ खंड आणि शेतकऱ्यांच्या वाढत्या अडचणी आमदार संचेती यांनी शासनाच्या निदर्शनास आणून दिल्या होत्या. शेतकऱ्यांच्या बांधावर पाणी नाही, पिकांना जीवदान देण्यासाठी आवश्यक पाऊस नाही आणि उत्पादन हातातून जाण्याची भीती आहे, अशा परिस्थितीत केवळ आकडेवारी न पाहता प्रत्यक्ष शेतकऱ्यांच्या वेदना लक्षात घेऊन निर्णय घ्यावा, अशी भूमिका त्यांनी मांडली होती.
या निर्णयामुळे दुष्काळी परिस्थितीचा सामना करणाऱ्या शेतकऱ्यांना विविध शासकीय सवलती व उपाययोजनांचा मार्ग खुला झाला आहे. यामध्ये जमीन महसुलात सूट, पीक कर्जाचे पुनर्गठन, शेती कर्जवसुलीस स्थगिती, कृषी पंपांच्या वीजबिलात सवलत, रोजगार हमीच्या कामांना चालना, आवश्यकतेनुसार पिण्याच्या पाण्याची व्यवस्था, चारा व अन्नधान्याची उपलब्धता आदी उपाययोजनांचा समावेश आहे.
“हा निर्णय शेतकऱ्यांच्या अश्रूंना दिलासा देणारा”
आमदार चैनसुख संचेती यांनी मुख्यमंत्री देवेंद्र फडणवीस यांचे आभार मानताना, “मलकापूर तालुक्यासह संपूर्ण बुलढाणा जिल्ह्यातील शेतकऱ्यांची परिस्थिती अत्यंत गंभीर होती. त्यामुळे दुष्काळ जाहीर करण्याची मागणी शासनाकडे सातत्याने केली. आज जिल्ह्यातील सर्व १३ तालुके दुष्काळग्रस्त यादीत आल्याने बळीराजाला मोठा दिलासा मिळाला आहे,” अशी भावना व्यक्त केली.
“शेतकरी हा केवळ आकडेवारीतील लाभार्थी नाही, तर आपल्या अन्नव्यवस्थेचा कणा आहे. त्याच्या पिकाचे नुकसान म्हणजे त्याच्या संपूर्ण कुटुंबाच्या उदरनिर्वाहावर आलेले संकट आहे. त्यामुळे शासनाने दुष्काळ जाहीर करण्याबरोबरच प्रत्यक्ष मदत शेतकऱ्यांपर्यंत पोहोचवावी, यासाठीही आपण पाठपुरावा करणार,” असे संचेती यांनी स्पष्ट केले.
दुष्काळ जाहीर झाल्याने शेतकऱ्यांच्या अडचणी पूर्णपणे संपलेल्या नसून आता पंचनामे, नुकसानभरपाई आणि प्रत्यक्ष सवलतींची प्रभावी अंमलबजावणी होणे महत्त्वाचे आहे. शासनानेही दुष्काळी मदत आणि उपाययोजनांची अंमलबजावणी करण्याचे संकेत दिले आहेत.
मलकापूरच्या शेतकऱ्यांच्या संकटाच्या काळात शासनदरबारी आवाज उठवत राहिल्याचा दावा करत आमदार चैनसुख संचेती यांनी या निर्णयाबद्दल मुख्यमंत्री देवेंद्र फडणवीस यांचे मनःपूर्वक आभार मानले असून, पुढील टप्प्यात शेतकऱ्यांना जास्तीत जास्त प्रत्यक्ष मदत मिळवून देण्यासाठी पाठपुरावा करण्याचे आश्वासन दिले आहे.