जवळा बाजार (Jawala Bazar Crime) : जवळा बाजार येथील ईदगाह नगर परिसरात शनिवारी पहाटे खुनाची धक्कादायक घटना उघडकीस आली. दोन मित्रांमधील आपसी वादातून ही घटना घडल्याचा प्राथमिक अंदाज पोलिसांनी व्यक्त केला असून संशयित आरोपी सध्या फरार आहे. मनोहर बाबू आप्पा साखरे असे मयत तरुणाचे नाव असून शनिवारी सकाळी ईदगाह नगरमधील एका रस्त्यावर त्याचा मृतदेह आढळून आला. घातक शस्त्राने चेहऱ्यावर वार करून चेहरा विद्रूप करण्याचा प्रयत्न केल्याचे प्राथमिक तपासात दिसून आले आहे.
घटनेची माहिती मिळताच पोलीस अधीक्षक निलाभ रोहन, अप्पर पोलीस अधीक्षक मीना, पोलीस उपाधीक्षक राजकुमार केंद्रे, औंढा नागनाथ पोलीस ठाण्याचे पोलीस निरीक्षक गणपत राहिरे तसेच जवळा बाजार पोलीस चौकीचे सहाय्यक पोलीस निरीक्षक कैलास भगत यांनी घटनास्थळी भेट देऊन पंचनामा केला. यानंतर गुन्हा अन्वेषण शाखेचे पोलीस फौजदार माधव जिव्हारे व विविध विभागातील अधिकारी-कर्मचारी घटनास्थळी दाखल होऊन तपासाला सुरुवात केली. श्वान पथकाचाही वापर करण्यात आला; मात्र काही अंतरापर्यंत माग काढल्यानंतर पुढे तो निष्फळ ठरला.
प्राथमिक माहितीनुसार, हा खून एका घरात झाल्याचा संशय असून दोन मित्रांतील वादातून ही घटना घडली असावी, असा अंदाज व्यक्त करण्यात येत आहे. मात्र नेमका खून कोणत्या कारणावरून झाला, याबाबत तपास सुरू आहे. या प्रकरणाचा तपास सहाय्यक पोलीस निरीक्षक कैलास भगत करत असून आरोपीच्या शोधासाठी पोलिसांनी चार पथके तैनात केली आहेत.
