मुंबईत ३९ वर्षीय सीएची ट्रेनसमोर उडी घेऊन आत्महत्या; पत्नी आणि तिच्या मित्राविरोधात गुन्हा
मुंबईतील गोरेगाव आणि राममंदिर रेल्वे स्थानकादरम्यान ३९ वर्षीय चार्टर्ड अकाउंटंटने ट्रेनसमोर उडी घेऊन आत्महत्या केल्याची घटना समोर आली आहे. वांद्रे येथील एका खासगी कंपनीत कार्यरत असलेल्या या सीएच्या मृत्यूप्रकरणी बोरीवली रेल्वे पोलिसांनी त्याच्या पत्नी आणि तिच्या मित्राविरोधात आत्महत्येस प्रवृत्त केल्याचा गुन्हा दाखल केला आहे. या प्रकरणाचा तपास सुरू आहे.
पोलिसांच्या प्राथमिक तपासानुसार, पत्नीच्या विवाहबाह्य संबंधाच्या संशयामुळे सीए मानसिक तणावात असल्याची माहिती समोर आली आहे. आत्महत्येपूर्वी त्याने आपल्या बहिणीसह एका मित्राला WhatsApp संदेश पाठवला होता. या संदेशात पत्नीचे एका तरुणासोबत अनैतिक संबंध असल्याचा आरोप केल्याचे तपासात आढळले आहे.
या प्रकरणाचा तपास सुरू असतानाच सीएच्या मोबाईल फोनमधील हा संदेश पोलिसांच्या हाती लागला. त्याच्या वडिलांनी दिलेल्या तक्रारीच्या आधारे बोरीवली रेल्वे पोलिसांनी पत्नी आणि तिच्या मित्राविरोधात गुन्हा दाखल केला आहे. मात्र, संदेशातील आरोपांची तसेच संबंधित व्यक्तींविरोधातील इतर आरोपांची पोलिसांकडून पडताळणी केली जात आहे.
मिळालेल्या माहितीनुसार, रविवारी कुटुंबात वाद झाला होता. त्यानंतर दुसऱ्या दिवशी सकाळी सीए नेहमीप्रमाणे कामावर जाण्यासाठी घराबाहेर पडला. मात्र, दुपारी तक्रारदाराच्या मुलीने फोन केल्यानंतर तो रुग्णालयात असल्याची माहिती कुटुंबीयांना मिळाली.
कुटुंबीयांना माहिती मिळाल्यानंतर त्यांनी रुग्णालयात धाव घेतली. तेथे डॉक्टरांनी त्याला मृत घोषित केले. त्यानंतर झालेल्या प्राथमिक तपासात गोरेगाव-राममंदिर रेल्वे स्थानकादरम्यान त्याने आत्महत्या केल्याचे समोर आले.
या घटनेनंतर बोरीवली रेल्वे पोलिसांनी प्रकरणाचा तपास हाती घेतला आहे. मृत सीएने आत्महत्येपूर्वी केलेल्या WhatsApp संदेशातील आरोप, कौटुंबिक वाद तसेच पत्नी आणि तिच्या मित्राची भूमिका यांची पोलिसांकडून चौकशी केली जात आहे. दोघांविरोधात आत्महत्येस प्रवृत्त केल्याप्रकरणी गुन्हा दाखल असून, पुढील तपास सुरू आहे.
