अवैध वाळू वाहतूक करणारे ट्रॅक्टर महसूल पथकाकडून जप्त

माहूर तहसील कार्यालयाच्या गौण खनिज पथकाची मध्यरात्री धडक कारवाई

माहूर/ नांदेड (Illegal sand transportation) : सहाय्यक जिल्हाधिकारी, यांच्या आदेशाने व तहसीलदार, माहूर यांच्या मार्गदर्शनाखाली तहसील कार्यालय माहूरच्या गौण खनिज पथकाने दि. १० सप्टेंबर च्या मध्यरात्री अवैध रेती वाहतुकीविरोधात धडक कारवाई केली. या कारवाईत अवैध रेती वाहतूक करणारे एक ट्रॅक्टर जप्त करण्यात आले.

दि.१०  रोजी रात्री सुमारे १२ वाजण्याच्या सुमारास गौण खनिज पथक कर्तारसिंग तांडा परिसरात गस्त घालत असताना धानोरा येथून अवैध रेती वाहतूक करणारे एक ट्रॅक्टर येताना पथकाच्या निदर्शनास आले. (Illegal sand transportation) पथकाने सदर ट्रॅक्टरचा पाठलाग केला असता, चालकाने कर्तारसिंग तांडा परिसरात पथकासमक्ष धावत्या ट्रॅक्टरमधील अंदाजे एक ब्रास रेती खाली करून ट्रॅक्टरसह धानोरा येथील शेतरस्त्याने पळ काढला पथकाने पाठलाग सुरू ठेवत पैनगंगा नदीपात्राजवळ ट्रॅक्टरला पकडले.

मात्र, नदीपात्रातील चिखलात ट्रॅक्टर पूर्णपणे फसल्याने ते बाहेर काढण्याचा प्रयत्न करण्यात आला. दुसऱ्या ट्रॅक्टरच्या सहाय्यानेही प्रयत्न करून देखील ट्रॅक्टर बाहेर काढणे शक्य झाले नाही अखेर सकाळी ६ वाजण्याच्या सुमारास सदर मुद्देमालाचा  पंचनामा करण्यात आला. त्यानंतर जप्त करण्यात आलेले ट्रॅक्टर पोलिस पाटील, मोहपूर प्रदीप सोनटक्के यांच्या ताब्यात देण्यात आले.

सदर कार्यवाही तहसीलदार अभिजित जगताप यांच्या मार्गदर्शनात पथक प्रमुख नायब तहसीलदार कैलास जेठे, ग्राम महसूल अधिकारी ज्ञानेश्वर पेंटेवाड, सुनील वणवे, कोतवाल बंडू चिरंगे, संतोष डाके, विलास शेळके, जनार्दन आढाव, चालक विलास शेडमाके यांनी केली