स्थानिक गुन्हे शाखा, पोलीस व महसूल पथकाची संयुक्त कारवाई
परभणी : गंगाखेड तालुक्यातील झोला शिवारातील गोदावरी नदी पात्रात सुरू असलेल्या अवैध वाळू उपशावर शनिवार (दि. २३ मे) रोजी स्थानिक गुन्हे शाखा, गंगाखेड पोलीस आणि महसूल विभागाच्या संयुक्त पथकाने मोठी कारवाई केली. या कारवाईत दोन तराफे आणि एक सक्शन पंप जाळून नष्ट करण्यात आला.
मिळालेल्या माहितीनुसार, झोला शिवारातील गोदावरी नदी पात्रातून तराफे आणि सक्शन पंपाच्या सहाय्याने अवैध वाळू उपसा सुरू असल्याची माहिती प्रशासनाला मिळाली होती. त्यानुसार परभणी स्थानिक गुन्हे शाखेचे सहाय्यक पोलीस निरीक्षक श्रीधर जगताप, पोलीस हवालदार माणिक वाघ, राहुल परसोडे, महेश कवठाळे, पोलीस शिपाई दिलीप निलपत्रेवार, शरद सावंत, चालक मो. इम्रान तसेच गंगाखेड पोलीस ठाण्याचे सहाय्यक पोलीस निरीक्षक शिवाजी सिंगणवाड यांच्या पथकाने महसूल विभागासोबत संयुक्त कारवाई केली.
महसूल विभागाच्या पथकात नायब तहसीलदार मो. आजीम, मंडळ अधिकारी शंकरराव राठोड आणि तलाठी शंकरराव गोरे यांचा समावेश होता.
शनिवार दुपारी सुमारे २:३० ते ३:३० वाजेदरम्यान करण्यात आलेल्या या कारवाईत गोदावरी नदी पात्रात आढळून आलेले दोन तराफे आणि एक सक्शन पंप जाळून नष्ट करण्यात आले.
यंत्राच्या सहाय्याने होणारा वाळू उपसा केव्हा थांबणार?
गंगाखेड तालुक्यातील मुळी, धारखेड, चिंचटाकळी, महातपुरी, आनंदवाडी, गौडगाव, झोला, मसला आणि नागठाणा या गोदावरी नदीकाठच्या गावांलगत असलेल्या वाळू घाटांचा लिलाव करण्यात आलेला आहे. मात्र, बहुतांश ठिकाणी नियमबाह्य पद्धतीने यंत्राच्या सहाय्याने वाळू उपसा केला जात असल्याच्या तक्रारी दिवसेंदिवस वाढत आहेत.
गोदावरी नदी पात्रातून सुरू असलेला अवैध वाळू उपसा नेमका केव्हा थांबणार, असा सवाल गंगाखेड शहरासह तालुक्यातील नागरिकांकडून उपस्थित केला जात आहे.
