पालम तालुक्यातून १.३४ लाखांची विदेशी दारू जप्त; एकाविरुद्ध गुन्हा दाखल
परभणी (Illegal Liquor Seizure) : पालम तालुक्यात अवैध दारू व्यवसाय पुन्हा एकदा चर्चेचा विषय ठरत असताना स्थानिक गुन्हे शाखेने (एलसीबी) धडक कारवाई करत पेठ पिंपळगाव येथून मोठ्या प्रमाणात विदेशी दारूचा साठा जप्त केला. विशेष म्हणजे ही कारवाई स्थानिक पोलिसांच्या नाकावर टिच्चून करण्यात आल्याने परिसरात विविध चर्चांना उधाण आले आहे.
स्थानिक गुन्हे शाखेला १७ मे रोजी मिळालेल्या गोपनीय माहितीनुसार पेठ पिंपळगाव येथील सुरेश सदाशिव मोडके यांच्या घरावर छापा टाकण्यात आला. या कारवाईदरम्यान “गोवा फॉर सेल” अशी विदेशी दारूचे तब्बल ८० बॉक्स जप्त करण्यात आले. जप्त करण्यात आलेल्या मुद्देमालाची अंदाजे किंमत १ लाख ३४ हजार ४०० रुपये असल्याचे पोलिसांनी सांगितले.
या प्रकरणी पालम पोलीस ठाण्यात गुन्हा क्रमांक २३१/२०२६ नोंद करण्यात आला असून महाराष्ट्र दारूबंदी अधिनियमाच्या कलम ६५ (ई) अंतर्गत कारवाई करण्यात आली आहे. पोलीस हवालदार राहुल ईश्वरराव परसोडे यांनी फिर्याद दिली आहे.
पोलीस निरीक्षक विवेकानंद पाटील यांच्या मार्गदर्शनाखाली पोलिस उपनिरीक्षक चंदन परिहार, हेडकॉन्स्टेबल राहुल परसोडे, पोलीस हवालदार महेश कवठाळे, माणिक वाघ तसेच पोलीस शिपाई दिलीप निलपत्रेवार आणि शरद सावंत यांच्या पथकाने ही कारवाई केली आहे.
