हिंगोलीत काही पेट्रोल पंपावर वाहन धारकांची गर्दी तर काहींचा संपला साठा

हिंगोली (Petrol Diesel Crisis) : आखातील देशातील युध्दामुळे इंधनावर त्याचा चांगलाच परिणाम जाणवत आहे. त्यातच दोन दिवसाच्या सुट्ट्या आल्याने बुधवारी काही पेट्रोल पंपावर वाहनधारकांच्या पेट्रोलसाठी मोठ्या रांगा लागल्या होत्या. तर काही पेट्रोल पंपावर साठाच नसल्याने पेट्रोल पंप बंद ठेवण्यात आला होता.  आखाती देशामध्ये युध्द सुरू असल्याने त्याचा परिणाम जाणवत आहे. हिंगोली जिल्ह्यात जवळपास ६२ पेट्रोल पंप आहेत. या (Petrol Diesel Crisis) पेट्रोल पंपावर प्रत्येक दिवशी दिड ते दोन लाख लिटर पेट्रोल उपलब्ध होत असते. तसेच ४ ते ५ लाख लिटर डिझेल उपलब्ध होते. जिल्ह्यामध्ये हजारो वाहनधारक असल्याने त्यांना तात्काळ डिझेल, पेट्रोल उपलब्ध व्हावे, या करीता प्रयत्न केले जात आहेत. 

हिंगोली शहर व परिसरात जवळपास १४ पेट्रोल पंप आहेत. आतापर्यंत कोणत्याही (Petrol Diesel Crisis) पेट्रोल पंपावर डिझेल, पेट्रोलचा तुटवडा जाणवला नाही. २४ मार्च रोजी रात्रीपासुन काही पेट्रोल पंपावर डिझेलचा तुटवडा जाणवला. २५ मार्च बुधवार रोजी काही पेट्रोल पंपावर पेट्रोल उपलब्ध असल्याने अनेक वाहन चालकांनी पेट्रोल घेण्याकरीता गर्दी केली होती. याच गर्दीला पाहून रस्त्यावरून येणार्‍या जाणार्‍या वाहन चालकांनी देखील पेट्रोलच्या तुटवड्याची भिती व्यक्त करून वाहनात पेट्रोल भरण्यासाठी अधिकच गर्दी केली होती.

विशेष म्हणजे पेट्रोल पंप (Petrol Diesel Crisis) धारकांना डिझेल, पेट्रोलसाठी अग्रीम रक्कम भरल्यानंतरच डिझेल, पेट्रोल डेपोवरून उपलब्ध करून दिले जात आहे. हिंगोली जिल्ह्याला गायगाव जि. अकोला व मनमाड जि. नाशिक या डेपोवरून डिझेल, पेट्रोल पुरविले जाते. दुपारी ३ वाजता डेपो बंद केला जात असल्याने पेट्रोल पंप धारकांची चांगलीच फजीती होत आहे. त्यातच शनिवार व रविवार हा सुट्टीचा दिवस आल्याने वाहनधारकांना डिझेल, पेट्रोल उपलब्ध करून देत असताना त्यांना तारेवरची कसरत करावी लागली.